ने. सं. ११४३ तछलाथ्व दशमी -

विश्वकपया हिट नेवाः म्येँ

थौं विश्वकप २०१८ या फाइनल जुयाच्वंगु दु । थ्व लछियंकं देन्यंकं विश्वकपया हे चर्चा जुयाच्वन । देय् हे विश्वकपमय जुयाच्वंगु इलय् विश्वकप लिसे हे स्वापू दुगु मेगु छगू चर्चाय् वयाच्वंगु धयागु गायक यमन श्रेष्ठया म्येँ नं जुयाच्वंगु दु ।

विश्वकप सुरु जूगु इलय् हे म्युजिक भिडियो दयेकाः पिहां वःगु थ्व म्येँ थौंकन्हय् युट्युब, फेसबुकय् हिट जुयाच्वंगु दु ।

अर्जेन्टिना ल्यये धाःसा छिमि ब्वा तंचाइगु,
ब्राजिलया पं लि धाःसा छिमि ब्वा तंचाइगु,
याकनं झीगु नेपालं वल्र्डकप म्हितूगु स्वये मन जुल दः
हे गोलऽऽ… धकाः क्वाप्प लालमोहन नयेमन जुल दः ….

विश्वकपया कासा सुरु जुसां निसें चर्चाय् नं वयाच्वंगु थ्व म्येँ फेसबुकय् जक स्वःपिं छगूत्या लाखं मल्याये धुंकल ।
फाइनल तक थ्यंबलय् म्येँ धयातःथें सुयां पं लियाः सुं तंचाइगु अवस्था ला मदयेधुंकल, छाय् धाःसां यक्वस्यां बिचाः हे यानामतः कथं क्रोसिया व फ्रान्स फाइनलय् थ्यनाच्वंगु दु । तर म्येँय् गायकं आशा यानातःथें नेपाः नं विश्वकप म्हितेगु स्वयेगु मन ला सकलें नेपाःमितय् जुया हे च्वंगु दु । उकिं नं थ्व म्येँ थपाय्सकं हिट नःगु जुइमाः ।

म्येँ हिट नःगुलिं ला यमन नं मख्ख हे जुयाच्वंगु दु, तर नेपाःया फुटबल विकासय् बेवास्ता जुयाच्वंगु खँय् धाःसा तसकं दुःखी जुयाच्वंगु दु । यमनं धाःगु दु, ‘खय्त ला नेपाः विश्वकप थ्यंगु झीसं स्वये खनी ला मखनीला, तर झीसं याकनं स्वये खनेदइगु छगू ज्या तकं बांलाक जुयाच्वंगु मदु । उकुन्हु त्रिपुरेश्वर जुयाः वनाच्वनागु, रंगशाला ध्याक्क न्ह्यःने खंबलय् मन हे खिन्न जुल । क्रोसिया छगू राष्ट्र कथं पिलू वःगु स्वीदँ हे मदुनिबलय् विश्वकपय् थःगु धाक क्यनेधुंकल, झी धाःसा छगू रंगशाला दयेकेत तं स्वीदँ पीमालीगु खः ला धयागु स्थितिइ लानाच्वंगु दु ।’

म्येँयात कयाः यमनं धाल, ‘थ्व म्येँ जिं प्यदँ न्ह्यः विश्वकप जुयाच्वंबलय् च्वयागु । उबलय् कलंकि पाखे वनाच्वनागु, निथ्वः मनूत छगू छगू देय्या पं लिनाः ल्वानाच्वंगु खना । उबलय् मनय् वंगु धाथें नेपाः हे विश्वकपय् थ्यंगु खःसा सुं नं अथे ल्वाये मालीमखुजुइ, सकलें नेपाःया हे पं लिनाः छप्वाः म्हुतुं सः थ्वयेका च्वनीगु खइ ।’

यमनं नेपालीं च्वःगु थ्व म्येँ नेवाः भासं नासलं लिइक वया अबुजु मदनकृष्णं उल्था यानाबिउगु खः । यमनया हे संगीत दुगु थ्व म्येया म्युजिक एरेन्जर जीवित जल्मी खः । विश्वकप सुरु जूगु इलय् इमेज च्यानलया ख्वताबजि ज्याझ्वलय् न्हापांखुसी रिलिज जूगु थ्व म्येँया म्युजिक भिडियो सुरेन्द्र तुलाधरं निर्देशन याःगु खःसा यमन लिसें ख्वताबजि टिमं म्हिताच्वंगु दु ।