विमान दुर्घटनाय् सीपिं ४९ म्ह थ्यंगु पुष्टि

येँ– थौं न्हिनय् त्रिभुवन विमानस्थलय् युनाइटेड बांग्ला एयरलाइन्सया विमान दुर्घटनाय् सीपिं ४९ म्ह थ्यंगु पुष्टि जूगु दु । ६७ म्ह यात्रु व प्यम्ह चालक दल सहित बंगलादेशया राजधानी ढाकाया शाहजलाल अन्तर्राष्ट्रिय विमानस्थलं ब्वयावःगु विमान सोमवाः न्हिनय् अन्तर्राष्ट्रिय विमानस्थलय् अवतरण यायेत्यंगु इलय् दुर्घटना जूगु खः ।

नेपाल प्रहरीया प्रवक्ता मनोज न्यौपानें ४० म्हेसिया सीम्ह दुर्घटनास्थलय् हे लगु व मेपिं गुम्ह उपचारया झ्वलय् अस्पतालय् सीगु खँ धयादीगु दु ।
विमानया भग्नावशेष चिइकाः माःबलय् तनाच्वन धाःसा च्याम्हेसिया सीम्ह नं लुइवं सीपिनि ल्याः अप्वःगु खः ।

विमान दुर्घटना लिपा प्रधानमन्त्री केपी ओली, गृहमन्त्री रामबहादुर थापा, सेना प्रमुखपिं विमानस्थल थ्यंगु खः । प्रधानमन्त्री केपी ओली सामाजिक सञ्जाल ट्विटरपाखें दुर्घटनाया छानवीन जुइगु खँ धयादीगु दु ।

दुर्घटनाग्रसत विमानय् ३७ म्ह मिजंपिं, २८ म्ह मिसा व निम्ह मस्त यात्रुकथं दुगु खः । विमानय् ३३ म्ह नेपाली, ३२ म्ह बंगलादेशी, छम्ह चिनिया व छम्ह माल्दिभ्सया नागरिक दुगु खँ सीदुगु ।