मेयर साह व उपमेयर डंगोलपाखें नेवाःभासं सपथ ग्रहण

येँ – येँ महानगरपालिकाया नवनिर्वाचित मेयर बालेन्द्र साह व उपमेयर सुनिता डंगोलं नेवाः भासं शपथ ग्रहण याःगु दु । मेयर शाहं नेपाली भासं शपथ ग्रहण यायेधुंकाः नेवाः भासं नं शपथ काःगु खः ।

सोमवाः राष्ट्रिय सभागृहय् जूगु शपथ ग्रहण ज्याझ्वलय् दौरा सुरुवाः न्ह्यानाः हाकु तपुलि पुनाः मेयर साहं सपथ ग्रहण याःगु खः । मधेसी मूलया साह येँ महानगरपालिकाया मेयर पदय् स्वतन्त्रं उम्मेदवार जुयाः त्यायेधुंकाः सामाजिक सञ्जालय् नेवाः भासं नं सपथ कायेमाःगु माग जुया वयाच्वंगु खः ।

मेयर साहं प्रमुख निर्वाचन अधिकृत पाखें सपथ कायेधुंकाः उपमेयर डंगोल लिसें येँ महानगरपालिकाया ३२ गुलिं वडाया वडाध्यक्षपिंत सपथ ग्रहण याकूगु खः ।

सपथ ग्रहण यायेधुंकाः मेयर साह व उपमेयर डंगोल येँ महानगरपालिकाया ज्याकुथिइ वनाः पदभार ग्रहण याःगु खः । पदभार ग्रहण लिपा पत्रकारत लिसे खँ ल्हासें साहं येँ महानगरया फोहर व्यवस्थापन मजुइकं थःम्हं मेगु ज्यायात प्राथमिकता मबीगु खँ धाःगु खः ।

स्वनिगःया फोहरं यानाः सिसडोलवासीत क्यान्सर पीडित जुयाच्वंगु, छ्यंगू ल्वय् जुयाच्वंगु धासें साहं धाःगु दु, ‘झीसं थ्व पाप गुबलय् तक कुबियाच्वनेगु ? उमिगु म्वायेगु अधिकार पूमवंक मेगु खँ झीसं ल्हायेगु जुइमखु ।’

पत्रकारतय्सं गुबलय् तकया दुने फोहर व्यवस्थापन जुइ धकाः न्यंगु न्ह्यसलय् साहं अःखतं पत्रकारतय्त झीगु खँ थुइत गुलि ई काइजुइ धकाः न्यंगु खः ।

अथेहे पदभार ग्रहण यायेधुंकाः उपमेयर डंगालं वइगु न्यादँ तक येँ महानगरवासीतय् हकहितया निंतिं थःम्हं ज्या यायेगु प्रतिबद्धता प्वंकूगु दु ।

‘पार्टी जुइमा वा स्वतन्त्र जुइमा, झी सकसिनं टिम स्पिरिटीइ विश्वास यायेमाः, उकिं आः व्यक्ति सफल जुल वा मजुल धयागु लिउलिउ जुइगु मखु, आःया प्राथमिकता धयागु व्यक्ति मखु संस्था खः’ उपमेयर डंगोलं धाःगु दु ।

सम्बन्धित बुखँ

LEAVE YOUR COMMENTS