ने. सं. ११४४ ञलाथ्व दशमी -

प्रम विरुद्ध फुक्क ख्यःया भूपूत

येँ – प्रधानमन्त्री केपी ओलीं निक्वःखुसी याःगु प्रतिनिधिसभा विघटन विरुद्ध देय्या थीथी ख्यःयापिं भूतपूर्व पदाधिकारीतय्सं थःगु बिचाः तया हःगु दु । उपिं फुकस्यां प्रम ओलीया सिफारिस कथं राष्ट्रपतिं संसद भंग याःगु गलत खः धासें संसद भंग जुइधुंकाः नं प्रधानमन्त्रीपाखें पूर्ण प्रधानमन्त्री सरह ज्या यासें बजेट समेत हयेगु कुतः यानाच्वंगु खँय् सरकारया आलोचना नं याःगु दु ।

थ्व झ्वलय् म्हिगः तिनि सर्वोच्च अदालतया पुलांपिं प्यम्ह प्रधानन्याया–धीशतय्सं छगू मंकाः वक्तव्य पिकासें प्रधानमन्त्रीपाखें निक्वःखुसी संसद भंग याःगु गलत खः धाःगु दु ।

थ्व स्वयां न्ह्यः म्हीग तिनि निर्वाचन आयोगया भूपू प्रमुख आयुक्ततय्सं छगू मंकाः वक्तव्य पिकासें थम्हं घोषणा यानातःगु चुनावयात ध्यानय् तयाः कामचलाउ सरकारं चुनावमुखी बजेट महयेत सरकारयात सचेत याःगु दु, नापं थुकिया लागिं सरकारयात सचेत याकेत निर्वाचन आयोगयात नं इनाप याःगु दु ।

अथे हे म्हीग भूतपूर्व अर्थमन्त्री–तय्सं नं छगू वक्तव्य पिकासें संसद मदुगु अवस्थाय् कामचलाउ प्रधानमन्त्रीं पूर्ण बजेट हये मदइगु खँय् सरकारया ध्यानाकर्षण याःगु दु । सरकारं याःगु चुनावया घोषणां देय्या अर्थतन्त्र प्रभावित जुइगु खँय् नं वय्कःपिंसं सतर्क याःगु दु ।
उकथं हे योजना आयोगया भूतपूर्व उपाध्यक्षतय्सं नं छगू मंकाः वक्तव्य जारी चुनावयात ध्यानय् तयाः सरकारं बजेटया ध्यबा खर्च याये फुगु खँय् सरकारया ध्यानाकर्षण याःगु दु ।

छुं न्हि न्ह्यः तिनि सभामुख अग्नी सापकोटां यानादीगु थ्व सहलह मुँज्याय् भूतपूर्व सभामुखतय्सं नं प्रम ओलीया आलोचना यासें संसद भंगया ज्यायात असंवैधानिक धकाः आलोचना यायेगु ज्या जूगु खः ।

आः दुपिं भूतपूर्व प्रधानमन्त्रीत शुरुंनिसें हे प्रम ओलीया विरुद्ध वनाच्वंगु दु । भूपू प्रधानमन्त्रीपिं शेर बहादुर देउवा, पुष्पकमल दाहाल, माधव नेपाल, झलनाथ खनाल, डा. बाबुराम भट्टराईपिं थ्व इलय् प्रम ओली विरुद्ध संघर्षय् हे कुहां वयाच्वंगु दु ।

राष्ट्रपतिपाखें याःगु संसद विघटनया ज्यायात भूतपूर्व राष्ट्रपति डा. रामवरण यादवं नं आलोचना यानादीगु दु । राष्ट्रपति विद्यादेवी भण्डारीं यानादीगु संसद विघटनया ज्यां संविधानया मर्मय् प्रहार याःगु खँ डा. यादवं धयादीगु खः ।

संसद भंगया ज्यायात संविधानया अःखः धासें नेपाल बारं विरोध यायेधुंकूगु दु । नापं नागरिक समाज नं प्रम ओलीया ज्या विरुद्ध सतक आन्दोलनय् कुहां वयाच्वंगु दु । देय्या थीथी थासय् निषेधाज्ञायात समेत तोडे यासें प्रदर्शन यायेगु लिसें राष्ट्रपति व प्रधानमन्त्रीया पुतला च्याकेगु ज्या जुयाच्वंगु दु ।