मेट्रो एफएमया २२ क्वःगु वार्षिकोत्सव खुम्ह संचारकःमियात सम्मान
येँ- येँ महानगरपालिकां न्ह्याका वयाच्वंगु मेट्रो एफएम ९४.६ मेगाहर्ज २२ दँ फुनाः २३ दँ क्यंगु दु । मेट्रो एफएमया २२ क्वःगु वार्षिकोत्सव वंगु शुक्रवाः थनया राष्ट्रिय सभागृहय् छगू विशेष ज्याझ्वः यासें हन । कोरोना भाइरसया संक्रमण व थुकिया जोखिमयात ध्यानय् तयाः सीमित सहभागितय् उपस्थितिइ मेट्रो एफएमं थःगु वार्षिकोत्सव हंगु खः ।
ज्याझ्वलय् येँ महानगरपालिकाया प्रमुख विद्यासुन्दर शाक्यं कोरोना संक्रमणया महामारीया इलय् विद्यार्थीतय् भौतिक उपस्थितिइ विद्यालय संचालन याये मफयाच्वंगु अवस्थाय् मेट्रो एफएमपाखें हे दकलय् न्हापां रेडियो दूर शिक्षा संचालन यानागु खँ कनादिल । वय्कलं गुगुं नं ज्या शुरु यायेबलय् आपालं कमि कमजोरी दयाच्वनीगु तर व हे ज्या मेपिंसं याइगु इलय् अज्याःगु कमि कमजोरी चिइकाः सुधार यायेगु अवसर दयाच्वनी धयादिल ।
‘मेट्रो एफएमपाखें दकलय् न्हापां रेडियो दूर शिक्षा संचालन यानागु इलय् छुं कमि कमजोरी दुगु खः । तर लिपा मेमेगु संचारमाध्यमपाखें नं उकथं विद्युतीय व रेडियोपाखें विद्यार्थी सिकाइ ज्याझ्वः न्ह्याकूबलय् मेट्रो एफएमय् खने दुगु कमि कमजोरीयात सुधार यानाः न्ह्याके खंगु जक मखु, बांलाक हे संचालन यायेत नं ताःलाःगु खनेदत’ प्रमुख शाक्यं धयादिल ।
‘संचार धइगु छगू संवेदनशील क्षेत्र खः’ वय्कलं धयादिल, ‘गबलें गबलें चिचिधंगु असावधानीं नं न्यनामिपिनिगु दथुइ भ्रम न्यंकेगु ज्या जुइफ, उकिं हिला वनाच्वंगु परिवेशकथं अत्याधुनिक प्रविधिया प्रयोग यानाः महानगरं याःगु ज्यायात महानगरवासी व न्यनामिपिनिगु दथुइतक थ्यंकेगु दायित्व संचारं पूरा यायेमाः । येँ महानगरपालिकाया प्रवक्तालिसें सूचना प्रविधिया संयोजक ईश्वरमान डंगोलं एफएमय् सुधार यायेमाःगु पक्ष आपालं दु धासें सूचना प्रविधि व सूचना संचारया ख्यलय् लगानी अप्वयेका यंकेगु जुइ धयादिल ।
संचारविद्लिसें उच्चस्तरीय प्रशासन सुधार आयोगया अध्यक्ष काशीराज दाहालं महानगरपालिकां विकास योजनाय् समुदायया सःयात दुथ्याकाः पारदर्शी व जवाफदेही सरकारया अभ्यास यानाच्वंगु दु धयादिल ।
रेडियोविद् रघु मैनालीं पत्रपत्रिका न्यानाः ब्वनेमाः, अनलाइन समाचार स्वयेत नं इन्टरनेटया शुल्क पुलेमाः उकिं निःशुल्क व निरक्षरया निंतिं संचार छगू उपयोगी माध्यम जूगुलिं रेडियो सेवाया विकल्प मदु धयादिल । नेपाल पत्रकार महासंघया अध्यक्ष विपुल पोखरेलं नं नुगःखँ तयादीगु ज्याझ्वलय् मेट्रो एफएमया खुम्ह संचारकःमियात झिंन्याद्वः तका दां व कदरपत्र नं लःल्हाःगु खः ।
थुकथं सम्मानित जुयादीपिंमध्ये मेट्रो एफएमया स्थापनाकालनिसें थौंतक ज्या याना वयाच्वनादीपिं श्रीकृष्ण महर्जन, उदेन न्हूसाय्मि, रिता महर्जन, स्टेशन म्यानेजर केशवप्रसाद नेपाल ‘केशु’, हाम्रो काठमाडौं टेलिभिजनया बैकुण्ठ भण्डारी व अनलाइन सम्पादक चन्द्रमणि भट्टराईयात हनेज्या याःगु खः।
ज्याझ्वलय् प्रमुख प्रशासकीय अधिकृत राजेश्वर ज्ञवाली, सहरी योजना आयोगया उपाध्यक्ष सरोज बस्नेत, वडाअध्यक्ष, कार्यपालिकाया दुजः, जनप्रतिनिधि, विभागीय प्रमुखपिनिगु उपस्थिति दुगु खः ।
LEAVE YOUR COMMENTS