सिक्किमय् येँयाः तःजिक हनेत सहलह
येँ (नेपालभाषा टाइम्स)- सिक्किमय् इन्द्रजात्रा गुकथं तःजिक हनेफइ धयागु खँय् सहलह यायेत सिक्किमया मुख्यमन्त्रीया जनसम्पर्क अधिकारी रत्नमणि प्रधान छगू प्रतिनिधिमण्डल लिसें यँे थ्यंकःझाःगु दु ।
सिक्किमया मुख्यमन्त्री प्रेमसिंह तामाङया जनसम्पर्क अधिकारी प्रधान लिसें मुख्यमन्त्री ज्याकूया थीथी अधिकारीपिं शनिवाः येँय् थ्यंकःझाःगु खः ।
सिक्किमय् हनावयाच्वंगु येँया (इन्द्रजात्रा) या जात्रायात अझ भब्यरुपं न्ह्याकेत छु गथे यायेफइ व यायेमालिइ धयागु बिषय लिसें निगू देय् दथुइया सांस्कृतिक सम्बन्धयात गुकथं सुमधुर याना यंकेफइ धयागु बिषयय् सहलह यायेत वय्कःपिं येँय् झाःगु खः ।
वय्कःपिं लिसें सिक्किम नेवाः गुथिया नायः निर्मल कुमार प्रधानया नेतृत्वय् गुथिया पदाधिकारीपिं नं येँ झाःगु खः । वय्कःपिंसं इन्द्रजात्रा व्यवस्थापन समितिनाप सहलह नं याःगु खः । येँया द्वारिका छेँय् बागमती प्रदेश सांसद शैलेन्द्र बज्राचार्यया मू आतिथ्यय् न्ह्याःगु सहलह ज्याझ्वलय् समितिया नायः गौतमरत्न शाक्य नापंया पदाधिकारी व जात्रानाप स्वापू दुगु गुथिया प्रतिनिधिपिंसं ब्वति काःगुु खः ।
सहलह ज्याझ्वलय् न्ववासें सिक्किम नेवाः गुथिया नायः प्रधानं सिक्किमय् हनाच्वनागु इन्द्रजात्रायात सिक्किम सरकारं हे अपनत्व कयाः न्ह्याकाच्वंगु हुनिं आःया दिनय् छु गुकथं न्ह्याःवनेमालिइ धयागु बिषयय् सहलह यायेत नेपाः वयागु खँ धयादिल ।
सिक्किम सरकारया पाखें प्रतिनिधित्व यानाःझाःम्ह सूर्य प्रधानं सिक्किम सरकार थःहे नेवाः समुदायया भाषा कला संस्कृतियात अझ व्यवस्थित यायेत नीति हे दयेकेगु पक्षय् दुगुलिं माःकथंया ग्वाहालि, छ्याता व हःपाःया निंतिं सहलह यायेत समितिनाप स्वापू तःवयागु धयादिल ।
सहलह ज्याझ्वलय् मू पाहाँ बज्राचार्यं झी नेवाःत भौगोलिक रुपं न्ह्याथाय् च्वंसां थःगु कला, संस्कृति, संस्कार संरक्षण संवद्र्धन यायते व थुकियात निरन्तरता बिइत लिचिले मज्यूगु धयादिल ।
ज्याझ्वलय् सिक्किम सरकारया मुख्यमन्त्री प्रेमसिंह तामाङ पाखें इन्द्रजात्रा ब्यवस्थापन समितियात व इन्द्रजात्रा ब्यवस्थापन समिति पाखें सिक्किम सरकारयात मतिनाया चिं लःल्हायेगु ज्या जूगु खः ।
सहलह लिपा सिक्किम सरकारया प्रतिनिधि व सिक्किम नेवाः गुथिया पदाधिकारी दुजःपिंसं बसन्तपुर स्थित राजकीय कुमारीया दर्शन याःगु खः
LEAVE YOUR COMMENTS