मल्लकालीन युद्ध कलाया जात्रा

थिमि (नेपालभाषा टाइम्स)- मध्यपुर थिमिइ मल्लकालीन ईया युद्ध कलाया शैलीया जात्रा पिथंगु दु । मल्लकालीन ईया युद्ध कला शैलीया खाँ पिहां वइगु जात्रा पिथंगु खः । थन पिहां वइगु थ्व जात्रायात पायः जात्रा वा भुयुफसि पालेगु जात्रा नं धाइ ।

वंगु कौलाथ्व एकादशिकुन्हु थिमि लाय्कुलिइ उगु जात्रा पिथंगु खः । लाय्कू तलेजु द्यःछेँय् खड्ग, ढाल, तरवार, युद्धकवचलिसें मल्लकालीन ईया युद्ध सामग्रीलिसें उगु जात्रा पिथंगु खः । जात्राया इलय् युद्धकला शैलीया प्रदर्शन नं याःगु खः ।

थिमि लाय्कूनाप स्वापू दुगु थ्व जात्रा पिहां वःगु इलय् जात्राय् सहभागिपिंसं तुयुगु जामा फिनाः खड्ग, ढाल, तरवार थेंज्याःगु युद्ध सामग्री ज्वनाः थीथी त्वालय् युद्ध कलाया प्रदर्शन यासें जात्रा याःगु खः ।

थिमिया लाय्कुलिं पिथनीगु जात्रा इनाय् त्वाः, निगू पुखू, दिगु भैरव, दथु त्वाः व बालकुमारीइ प्रदर्शन याःगु खः । थ्व जात्रा पिहां वइगु इलय् मेमेगु जात्राय् थें बासुरि मपुसे खालि प्वंगा जक पुइगु याइ ।

थ्व जात्रा विशेष यानाः तत्कालीन इलय् दरवारया प्रशासक जुयाच्वंपिं श्रेष्ठ, कर्माचार्य, जोशी, कुटु, प्याथः (प्रजापति), खड्गी आदि जातियापिंसं पिकाइगु खः ।