चलखं येँय् छम्ह सित

येँ (नेपालभाषा टाइम्स) – वंगु आइतवाः निसें वयाच्वंगु निरन्तर वाया कारणं स्वनिगः लिसे थीथी थासय् खुसिबाः वयाः आपालं धनजन क्षति जूगु दु। थ्व हे झ्वलय् येँय् हे चलखं ल्हाना छम्ह सीगु दु। कागेश्वरी मनोहरा नगरपालिका, गागलफेदीइ आइतवाः बहनी वःगु चलखं ल्हानाः नवराज गुरुब मदुगु खँ प्रहरीं धाःगु दु। वडाध्यक्ष मुकुन्द गजुरेलया कथं गुरुङ थः मांलिसे पिहां वःगु इलय् खुल्ला थासय् चलः वःगु खः । चलखं ल्हाःगु झिगू मिनेट लिपा हे उद्धार यायेगु ज्या जूगु खःसां नं
गुरुङ मदयेधुंकूगु खः ।

उकथं हे येँया किपू नगरपालिका-१० स्थित सुन्दरी घाटय् बागमति खुसी बस्तीइ दुहां वःगु दु। सुन्दरीघाटया सुकुम्बासी बस्तीय् खुसिबाः दुहां वंगु खः । खुसिबाः वयेवं अन दुगु प्यखा छेँ च्वंपिं नीम्हेसित उद्धार यायेगु ज्या जूगु खँ महानगरीय प्रहरी वृत्त किपुलिं जानकारी बिउगु दु ।

निरन्तर वा वयाच्वंगुलिं येँ नं हेटौंडा स्वाइगु चीहाकःगु लँ, भीमफेदी–कुलेखानी सतक खण्डय् चलः वनाः सवारी वये वनेगु ठप्प जूगु दु। भीमफेदी गढी लिकसं आइतवाः चान्हय् चलः वंगुलिं सवारी वये वनेगु बन्द जूगु इलाका प्रहरी कार्यालय भीमफेदी प्रहरीं जानकारी बिउगु दु ।

धादिङ व चितवन स्वाइगु गजुरीइ च्वंगु पृथ्वी राजमार्गया छपु ताँ नं खुसिबाः वयाः चुइकायंकूगु दु। अथेहे मौवा खोलां सतक हे चुइका यंकूगु दु । थुकिं यानाः स्वनिगःयात पिने जिल्लाय् स्वाइगु मू लँपु पृथ्वी राजमार्ग नं बन्द जूवंगु दु ।