दिगो विकासया निंतिं जनतायात केन्द्र विन्दुइ तयाः कार्ययोजना दयेकेत जोड

येँ – दिगो विकासया लक्ष्य हासिल यायेत सरकार, निजी ख्यः व नागरिक समाजं जनतायात केन्द्र विन्दुइ तयाः कार्ययोजना दयेकाः न्ह्याः वनेमाःगु खँय् सरोकारवालातय्सं बः बिउगु दु । एलडीसीवाच, सापे व प्राथमिक स्वास्थ्य सेवा स्रोत केन्द्र (रेस्फेक)या मंकाः ग्वसालय् जूगु ‘दिगो विकास लक्ष्यय् निजी ख्यःया भूमिका व जिम्मेवारी’ विषयय् जूगु अन्तरक्रिया ज्याझ्वलय् सरोकारवालातय्सं उकथं बः बिउगु खः ।

राष्ट्रिय योजना आयोगया उपाध्यक्ष डा. पुष्पराज कँडेलं एसडीजीयात केन्द्रीकृत यानाः बजेट हःगु व नेपालं दिगो विकास लक्ष्य हासिल यायेत आपालं मेहनत यायेमाःगु खनेदुगु अध्ययन प्रतिवेदनं क्यंगु दु धयादिल । निजी ख्यलं नाफा कमे यायेगु उद्देश्य जक पूवंकेत स्वःगु धासें सामाजिक उत्तरदायित्वयात केन्द्रविन्दुइ तयाः ज्या यायेमाः धयादिल ।

‘राज्य व जनतायात छले यानाः न्ह्याथे यानाः जूसां कमे जक यायेगु प्रवृत्ति हावी जुल धाःसा उकिं असमानता कायम जुयाः द्वन्द्वय् फँसे जुइफु’ वय्कलं धयादिल । ज्याझ्वलय् एलडीसी वाचया संयोजक गौरी प्रधानं निजी ख्यलं शिक्षा, स्वास्थ्य, अर्थ, विकास, वातावरण, यातायात लगायतया आपालं क्षेत्रय् महत्वपूर्ण योगदान बिउगुलिं दिगो विकास लक्ष्यय् नं तःधंगु देन दइ धयादिल ।

‘दिगो विकासया लक्ष्य हासिल यायेत दँय्दसं ७ निसें ८ प्रतिशत आर्थिक वृद्धिदर हासिल यायेमाःगु व उकिया निंतिं निजी ख्यःया भूमिका महत्वपूर्ण जुइ’ वय्कलं धयादिल । रेस्फेकया कार्यकारी निर्देशक शान्तलाल मुल्मीं स्वास्थ्य, शिक्षा, त्वनेगु लः, यातायातया क्षेत्रय् दिगो विकासया लक्ष्य हासिल यायेत निजी ख्यलं म्हितीगु भूमिका महत्वपूर्ण जुइ धयादिल ।

ज्याझ्वलय् थीथी संघसंस्थाया प्रतिनिधिपिंसं दिगो विकास लक्ष्य हासिलया विषयय् थःथःगु नुगःखँ तयादीगु खः ।
ज्याझ्वः लिपा दिगो विकास लक्ष्य हासिल यायेत सरकार, निजी ख्यः व नगरिक समाज छप्पँ जुयाः न्ह्याः वनेमाःगु निष्कर्ष पिकासे येँँ घोषणापत्र नं जारी याःगु खः ।

सम्बन्धित बुखँ

LEAVE YOUR COMMENTS