चीन व भारत सक्रिय जुया वल
येँ (नेपालभाषा टाइम्स)÷नेपालय् निक्वःखुसी संसद विघटन जुयाः ब्वलंगु राजनीतिक अस्थिरतायात कयाः जःलाखःला देय् चीन व भारतं ‘सरोकार’ क्यनाहःगु दु । भारतं नेपाःया घटनायात थःपिनि जानकारीइ कयागु खँ धाःगु दुसा चीनं स्थिति थुइकेगु लागिं नेपाःया शीर्ष नेतातलिसे संवाद न्ह्याकूगु दु ।
संसद भंग जूगु न्यान्हु लिपा वयाः भारतं नेपाःया घटनायात कयाः टिप्पणी याःगु खः । म्हिगः भारतीय विदेश मन्त्रालयया प्रवक्ता अरिन्दम बागचीं नेपालय् विघटित राजनीतिक घटनायात नेपाःया आन्तरिक मामिला धाःगु दु । नापं नेपालय् विकसित थ्व घटनायात भारतं ‘नोटिस’ यानाच्वनागु खँ नं वय्कलं कनादीगु खः ।
भारतया पुलांम्ह पासा जूगु कारणं नेपाःयात भारतपाखें बी माःगु फुक्क कथंया ग्वाहालि चूलाका हे च्वनेगु बचं नं बागचीं बियादीगु दु ।
भारतया थज्याःगु प्रतिक्रिया वयेवं ताःई तक मौन जुयाच्वंम्ह चीनं नं आः थःगु सक्रियता क्यनाहःगु दु । नेपालय् विकसित थ्व घटनाया बारे खँल्हाबल्हा यायेत म्हिगः चिनियाँ कम्युनिष्ट पार्टीया विदेश विभाग प्रमुख सोङ ताओं थनया फुक्कं तःधंगु पार्टीया शीर्ष नेतातलिसे भर्चुयल खँल्हाबल्हा याःगु खँ सीदुगु दु ।
पुस ५ गते प्रधानमन्त्री केपी ओलीं न्हापांखुसी संसद भंग याःगु इलय् नेपाःस्थित चिनियाँ राजदूत थः जक सक्रिय जुयां मगानाः चीनपाखें विशेष टीम हे झिके यानाः खँल्हाबल्हा न्ह्याकूगु खः । तर थःपिनि कुतः असफल जुइवं चीन सुम्क च्वनाच्वंगु खः ।
निक्वःखुसी जूगु संसद विघटन लिपा चीन न्हापा थें न्ह्यःने मवःसां भारत धाःसा खने दयेके हे न्ह्यःने वयाच्वंगु दु । खास यानाः प्रधानमन्त्री ओलीयात समर्थन यायेगु लागिं जनता समाजवादी पार्टीया महन्थ ठाकुर व राजेन्द्र महतोया पुचःयात भारतं हे सल्लाह बियाच्वंगु खँ पिहां वयाच्वंगु दु । प्रम ओलीलिसे खँल्हाबल्हा यायेगु झ्वलय् ठाकुर व महतो तःक्वःमछि भारतीय दुतावास दुहां वंगु खँ नं चर्चाय् वयाच्वंगु दु ।
चीनयात सतीके मबीगु भारतया कुतः
नेपाःया राजनीतिक संकटय् थुगुसी भारतं प्रधानमन्त्री केपी ओलीयात समर्थन यानाच्वंगु खँय् भारतीय विज्ञतय्सं आलोचना यानाहःगु दु । भारतय् नेपाःविज्ञ कथं नांजाःम्ह प्रा. एसडी मुनिं प्रधानमन्त्री केपी ओलीं थौंकन्हय् लोकतन्त्र व गणतन्त्रया खिलाप ज्या यानाच्वंगु जूगुलिं वय्कःयात समर्थन यायेबलय् कन्हय् उकिं भारतयात समेत समस्याय् लाकीगु बिचाः तयादीगु दु ।
भारतया संस्थापन पक्षं थ्व इलय् यदि ओलीयात समर्थन मयात धाःसा वय्कः चिनियाँ क्याम्पय् वनीगु व वयां लिपा हानं वाम एकता कायम जुइगु खतरा दुगुलिं ओलीयात समर्थन यायेमाःगु खः धइगु बिचाः तयाच्वंगु नं भारतीय विज्ञतय्गु द्वपं दु । तर प्रम ओलीं संविधान व लोकतन्त्रया प्रतिकुल ज्या यानाच्वंगु जूगुलिं वय्कःयात समर्थन यायेबलय् भारत थःगु लोकतान्त्रिक मान्यतापाखें विचलित जूगु ठहर जुइ धइगु नं उमिगु बिचाः खनेदु ।
LEAVE YOUR COMMENTS