ने. सं. ११४६ बछलागा चौथी -

झाःझाः मत सीगुलिं मन्त्रीं सःतल हाकीमत

येँ (नेपालभाषा टाइम्स) – नेपाल विद्युत प्राधिकरणय् कुलमान घिसिङ बिदा कयाः पिहां वनेवं स्वनिगलय् विद्युत आपूर्ति नं गडबड जुइवं सरकार चिन्तित जूगु दु। घिसिङयात हानं नियुक्त यायेमाः धकाः पिने सार्वजनिक प्रदर्शन जुयाच्वंगु हे इलय् मेखे घरिघरि मत नं सीगु जुयाच्वंगु खँय् चिउताः प्वंकुसें म्हिगः उर्जा मन्त्री वर्षमान पुनं प्राधिकरणया सकलें उच्चस्तरीय पदाधिकारीतय्त मन्त्रालयय् सःताः मतया आपूर्ति व्यवस्था तुरुन्त मिले या धकाः निर्देशन बियादीगु खः । वय्कलं घिसिङया बहिर्गम जुइवं मत वयेगु गडबड जूगुलिं आःया पदाधिकारीतय्त सकस्यां शंकाया मिखां स्वया हःगु खँ नं कनादिल । पदाधिकारीतय्सं वंगु छुं न्हि न्ह्यवंनिसें मदिक्क वा वयाच्वंगु कारणं मत सिनाच्वंगु व जनताय् उकिया बारे इलय् हे जानकारी मबिउगु कारणं भ्रम सिर्जना जुयाच्वंगु खः धकाः मन्त्रीयात ब्रिफिङ याःगु खः ।