मिसा खलःया स्वीप्यक्वःगु दँमुँज्या
येँ(नेपालभाषा टाइम्स)- नेपालभाषा मिसा खलःया स्वीप्यक्वःगु दँमुँज्या वंगु थिंलागा दशमि (पुस २१) शनिवाःकुन्हु जुल । स्वयम्भूस्थित खलःया थःगु हे भवनय् जूगु दँमुँज्या खलःया नायः धर्मशोभा तुलाधरया सभापतित्वय् जूगु खः ।
वंगु दछिया दुने दिवंगत जुयादीपिं खलःया जः व जःपिनि छेँजःया लुमन्तिइ छगू मिनेट मौनधारण यासे न्ह्याःगु ज्याझ्वलय् खलःया लिउछ्याञ्जे पद्मलक्ष्मी ताम्राकारं लसकुस यानादीगु खः ।
खलःया छ्याञ्जे प्रेमहिरा तुलाधरं आर्थिक दँ ०७९÷८०या वार्षिक प्रतिवेदन व भावी कार्ययोजना न्ह्यब्वयादीगु दँमुँज्याय् दांभरिं पूर्णिमा डंगोलं वंगु आर्थिक दँया आर्थिक प्रतिवेदनलिसें लेखा परीक्षण प्रतिवेदन न्ह्यब्वयादीगु खः ।
निगुलिं प्रतिवेदनय् खलःया जःपिंसं व्यापक सहलह यासें थःथःगु सुझाव बियादीगु खः । ज्याझ्वलय् खलःया जःपिं कमलेसलता राजभण्डारीं बःचाहाकलं प्रतिवेदन न्ह्यब्वयेमाःगु, अञ्जना ताम्राकारं वार्षिक प्रतिवेदन नेवाः भासं न्ह्यब्वयेमाःगु सुझाव बियादीगु खःसा वयां लिपा निगुलिं प्रतिवेदन सर्वसम्मत रुपं पारित याःगु खः।
दँमुँज्यां वइगु आर्थिक दँया निंतिं एमआर एशोसियटया भाजु मचाराजा महर्जनयात लेखापरीक्षक नियुक्त यायेगु क्वःछिउगु खःसा पारिश्रमिक व मेमेगु आवश्यक सकतां ज्याखँ क्वःछीगु अधिकार जसना पुचःयात हे भाला बीगु क्वःछिउगु खः ।
दँमुँज्याय् खलःया निवर्तमान नायः मंगला कारंजित, संरक्षक सुवर्णकेशरी चित्रकारं नं थःथःगु नुगःखँ तयादीगु खः । वय्कःपिंसं भाषा, साहित्य, संस्कृतिया ख्यलय् खलकं याना वयाच्वंगु ज्यायात कयाः च्वछासे खलकं याइगु थुकथंया ज्याझ्वलय् अझ अप्वः मिसातय्त सक्रिय रुपं सहभागि यायेत इनाप यानादिल ।
खलःया नायः धर्मशोभा तुलाधरं खलःया थीथी ज्याझ्वलय् ग्वाहालि यानादीपिंत सुभाय् देछासे थःगु नुगःखँ तयादीगु ज्याझ्वलय् न्वकु निर्मला तुलाधरं सुभाय् देछानादीगु खः ।
LEAVE YOUR COMMENTS