कोरोना परीक्षण व उपचार निःशुल्क मयायेगु निर्णय : मन्त्रीत हे जिम्मेवारी कायेत लिलिचिल

येँ (नेपालभाषा टाइम्स) – सरकारं कोरोना संक्रमिततय् उपचार व परीक्षणया खर्च फुक्कं ल्वगि व ल्वगिया परिवारं हे व्यहोरे यायेमाःगु निर्णय यायेवं थुकिया तच्वःगु आलोचना जूगु दु। मन्त्रिपरिषद्या आइतवाः च्वंगु बैठकं सरकारं आवंलिं फुक्कं नागरिकतय् निःशुल्क परीक्षण व उपचार मयायेगु निर्णय याःगु खः । थ्व निर्णययात कयाः प्रमुख प्रतिपक्षी नेपाली कांग्रेस लिसें फुक्क धयाथें राजनीतिक पार्टीतय्सं विरोध याःगु दु। अथेहे सर्वसाधारणं नं सामाजिक सञ्जालपाखें थुकी तःधंगु आक्रोश प्वंका हयाच्वंगु दु।

मेखे थःगु निर्णययात कयाः आलोचना सुरु जुइवं सरकारया मन्त्री व अधिकारीत हे थ्व निर्णयया जिम्मेवारी कायेत लिलिचिलाच्वंगु दु। मन्त्री, राज्यमन्त्री व स्वास्थ्य मन्त्रालयया अधिकारीतय्सं हे वं वयात वं वयात पन्छे यानाः सरकारया निर्णययात कयाः प्रतिक्रिया तकं बीत लिचिलाच्वंगु दु। बिबिसीया कथं सरकारया न्हूम्ह प्रवक्ता सुचना तथा संचार मन्त्री पार्वत गुरुङं थः नकतिनि मन्त्रिमण्डलय् वयागु जूगुलिं थःके जानकारी मदु, स्वास्थ्य मन्त्रालययात हे न्यं धाःगु दुसा स्वास्थ्यमन्त्री भानुभक्त ढकाल धाःसा सम्पर्कय् तकं वयाच्वंगु मदु। वय्कःया निजी सचिवं मन्त्री मंगलवाः जक थुकिया बारे प्रतिक्रिया बी धाःगु दु ।

अथेहे सरकारी निर्णयया जानकारी न्हापांखुसी बियादीम्ह स्वास्थ्य मन्त्रालयया प्रवक्ता डा. जागेश्वर गौतमं नं थ्व मन्त्रिपरिषद्या निर्णय जूगुलिं थःम्हं छुं मसिउ धयादीगु दु। स्वास्थ्य राज्यमन्त्री नवराज रावतं नं थुकिया बारे थःम्हं छुं मसिउ धासें धयादीगु दु, ‘जि क्याविनेट मन्त्री मखु, उकिं सरकारया थ्व निर्णय छाय् जुल धयागु बारे जिं मस्यू ।’

स्वास्थ्य मन्त्रालयं आइतवाःया पत्रकार सम्मेलनय् वंगु असोज १९ गते हे मन्त्रिपरिषद्या बैठकं थ्व निर्णय यायेधुंकूगु व थ्व निर्णय आइतवाःनिसें लागू जूगु धाःगु खः । मन्त्रालयया प्रवक्ता डा. गौतमं आर्थिक रुपं विपन्न, अशक्त, असहाय अवस्थाय् दुपिं नागरिक, असहाय याकः मिसा, अति अपाब जूपिं, जेष्ठ नागरिक, न्ह्यःने खटे जुइपिं स्वास्थ्यकर्मी, सरसफाइ कर्मचारी, सुरक्षाकर्मी व जोखिम क्षेत्रय् ज्या यानाच्वंपिं कर्मचारीतय्क लक्षण खनेदत धाःसा उमित जक निःशुल्क परीक्षण व उपचार यायेगु खँ धाःगु खः ।

लिसें उमि परीक्षण व उपचार खर्च बिमा यानातःगु दुसा बीमा कम्पनीपाखें बेहोरे यायेगु धाःगु खः । तर सरकारया थ्व निर्णययात कयाः वंगु वालय् जक सर्वोच्च अदालतं सकलें नागरिकयात निःशुल्क उपचार यायेत सरकारयात निर्देशनात्मक फैसला न्यंकूगु खः ।

सरकारी अस्पतालय् डिपोजिट कायेगु सुरु
सरकारं कोरोना संक्रमिततय् उपचार निःशुल्क मयायेगु निर्णय यायेवं सरकारी अस्पतालतय्सं कोरोनाया बिरामीतय्त डिपोजिट कयाः जक भर्ना यायेगु सुरु याःगु दु। येँया महाराजगञ्जया शिक्षण अस्पताल व पाटन अस्पतालं कोरोनाया उपचार याःवःपिंके डिपोजिट कायेगु सुरु याःगु दुसा सिभिल अस्पतालं छगू सुचं हे पिथनाः आवंलि निःशुल्क परीक्षण व उपचार मजुइगु खँ धाःगु दु ।

मेखे टेकु अस्पताल व सशस्त्र प्रहरी अस्पतालं धाःसा सरकारया निर्देशिक थःपिंथाय् मथ्यंनिगुलिं सोमवाः तक न्हापा थें हे निःशुल्क उपचार यानाच्वनागु खँ धाःगु दु। सरकारया निर्देशिका वल धायेवं थःपिंसं नं गुलि ध्यबा कायेगु निर्णय यायेगु खँ धाःगु दु ।

सरकारं कोरोना उपचारया निंतिं सामान्य लक्षण खनेदुपिंके न्हि ३५००, मध्यम लक्षण खनेदुपिंके ७ हजार व आइसियुलय् तयेमाल धाःसा १५ हजार कायेगु निर्णय यानातःगु दु। शिक्षण, पाटन अस्पतालं सरकारया थ्व हे निर्णय कथं ध्यबा कायेगु अस्पताल प्रशासनं निर्णय यायेधुंकूगु खँ धाःगु दु ।

सम्बन्धित बुखँ

LEAVE YOUR COMMENTS