छम्ह मनू न्ह्यःने तयाः मेम्हेसिया जलस्येँ लिकात
येँ – छम्ह मनूया धकाः मेम्ह मनूया जलस्येँ (किड्नी) लिकयाः मिउगु द्वपनय् निदान अस्पतालया प्रमुख कार्यकारी अधिकृत लिसें न्याम्हेसित प्रहरीं ज्वंगु दु । प्रहरीं यलया पूच्वय् च्वंगु निदान अस्पतालया प्रमुख कार्यकारी विपेन्द्र प्रधानलिसें अस्पतालया कानुनी सल्लाहकार कुमुदकुमार भट्टराई, अस्पतालया डाक्टर राजेश पन्त, जलस्येँ न्यानाकाःम्ह शंकरलाल लामा व जिल्ला प्रशासन कार्यालयया शाखा अधिकृत रामचन्द्र आलेयात ज्वंगु खः ।
प्रहरीया मानव बेचबिखन अनुसन्धान ब्युरों धाःकथं उमिसं छम्ह मनूया जलस्येँ लिकायेगु धइगु भ्वं दयेकाः मेम्ह हे मनूया जलस्येँ लिकयाः विरामीयात प्रत्यारोपण याःगु खः । प्रहरी अनुसन्धानपाखें सीदु कथं जलस्येँया विरामी रामेछापया दोरम्बाय् छेँ दुम्ह शंकरलाल लामां थः हे भिन्चाया जलस्येँ लिकयाः थःके प्रत्यारोपण यायेगु धकाः भ्वं दयेकूगु खः ।
तर धाथें जलस्येँ लिकाःबलय् धाःसा भिन्चाया मखुसें काभ्रेय् च्वंम्ह छम्ह गरिब ल्याय्म्हया जलस्येँ लिकाःगु खः । थौंकन्हय् ख्वपया छगू गलैंचा कारखानाय् ज्या याइम्ह उम्ह ल्याय्म्हयात स्वंगू लाख तका दां बियाः जलस्येँ न्याना काःगु द्वपं प्रहरीं बिउगु दु । थ्व ज्याय् अस्पतालया चिकित्सक डा. राजेश पन्त व सिईओ विपेन्द्र प्रधानया समेत मिलोमतो दु धासें प्रहरीं उमित समेत ज्वंगु खः ।
प्रहरीं धाः कथं विरामी लामां गुम्ह मनूयागु जलस्येँ कायेगु धकाः नाता प्रमाणित समेत यानाः न्ह्यःने थने हःगु खः, धाथें जलस्येँ लिकाःबलय् धाःसा उम्ह मनू मखुसें मेम्ह हे मनूया लिकाःगु खः । नियम कथं जलस्येँ लिकाये न्ह्यः नाता प्रमाणित यानाः मनू न्ह्यःने तये हयेवं अस्पतालया समितिं उकियात स्वीकृति बी ।
तर थुकी धाःसा समितिं स्वीकृति समेत बीधुंकाः जलस्येँ बीम्ह मनू हिला बिउगु खँ धाःगु दु । जलस्येँ बिउम्ह ल्याय्म्हयात नं उमिसं छगः जलस्येँ लिकाःसां छुं जुइ मखु धकाः झुके यानाः हःगु सीदुगु दु । वयात दलालतय्सं सम्पर्कय् हःगु खः । वयात स्वंगू लाख तका जक दां बिउसां दथुइ दलालतय्सं यक्व ध्यबा काःगु कयाः चलखेल याःगु अनुमान याःगु दु ।
LEAVE YOUR COMMENTS