१९ वडाय् १ लाख लिटरया ट्याङ्की

येँ (नेपालभाषा टाइम्स) – येँ महानगरपालिका वडा नं. १९ कंगय् छगः लः फिल्टर यायेगु प्लान्टलिसें १ लाख लिटरया ट्याङ्की दयेकीगु जूगु दु ।

प्रदेश सांसद राजेश शाक्यया सांसद विकास कोषया ३५, ८०,६८९/२१ तका व जनसहभागितापाखें तका ३९७८५४/३६ यानाः मुक्कं ३९७८५४३/५७ तका ध्यबां उगु ट्याङ्की दयेकेगु ज्या जुइगु खँ दमाइचाघाट खानेपानी उपभोक्ता समितिया छ्याञ्जे सुरज मालाकारं जानकारी बियादिल । थुगु आयोजनाया बारे जानकारि बीत शनिवाः चिबहाःख्यलय् छगू ज्याझ्वःया ग्वसाःग्वःगु खः । अन बोरिङ यानाः पिकयातःगु लखय्बु लुगु ध्याचः, आइरनया मात्रा तसकं आपाः दुगुलिं फिल्टर प्लान्ट दयेकाः त्वनेगु लः वितरण यायेगु योजना दयेकेमाःगु व उकियात सांसद कोषपाखें कार्यान्वयन याये दयाः लय्ताः वःगु खँ काठमाडौं उपत्यका खानेपानी लिमिटेडया मृगेन्द्रमान श्रेष्ठं ज्याझ्वलय् धयादिल ।

ज्याझ्वलय् सांसद राजेश शाक्य, १९ वडाया वडाया नायः शशिलाल श्रेष्ठ, उपभोक्ता समितिया नायः मिलन शाही, दुजः शंकर महर्जन, डिजाइनर राजेश महर्जनपिंसं आयोजनाया थीथी पक्षयात कुलाः न्ववानादीगु खः ।