प्यक्वःगु विश्व नेवाः मुना जुइगु, संयुक्त श्रेष्ठ न्हूम्ह नायः जुइगु सम्भावना

येँ (नेपालभाषा टाइम्स)÷हलिंन्यंकं च्वंपिं नेवाःतय्गु अन्तर्राष्ट्रिय संस्था हलिं नेवाः दबू – वल्र्ड नेवाः अर्गनाइजेशन (डब्लुएनओ) या प्यक्वःगु तःमुँज्या थुगुसी अमेरिकाया न्यूयोर्कय् जुइगु जूगु दु । तःमुँज्यां थुगुसी डब्लुएनओया न्हूगु नेतृत्व नं ल्यइगु जूगुलिं उकिया लागिं समेत तयारी जुयाच्वंगु दु ।

आः तक जुयाच्वंगु तयारी कथं डब्लुएनओया न्हूम्ह नायः कथं बेलायतय् च्वनादीम्ह भाजु संयुक्त श्रेष्ठ सर्वसम्मत निर्वाचित जुइगु सम्भावना अप्वया वःगु दु । तःमुँज्याय् जुइगु चुनावया लागिं पदाधिकारी जुइत नां दर्ता याःपिं उम्मेदवारपिनि अन्तिम धलः म्हिगः सार्वजनिक याःगु खःसा उकी नायः पदय् भाजु श्रेष्ठ छम्हेसिगु जक नां लानाच्वंगु खः ।

प्रकाशित उम्मेदवारपिनि अन्तिम धलः कथं वरिष्ठ न्वकु पदय् अमेरिकाया समिर महर्जन व न्वकु पदय् न्यूजिल्याण्डया कमल श्रेष्ठ अले अमेरिकाया समन्तश्रीरत्न वज्राचार्यं नां दर्ता यानादीग दु । अथे हे मू छ्यांज्ये पदया लागिं इस्टोनियाया सोभित शाक्यं नां दर्ता यानादीगु दु । मू दुजःया लागिं नेपाः, अमेरिका व आयरल्याण्डया च्याम्हेस्यां नां दर्ता याःगु दु ।

थुकी मुक्कं १५ म्हेस्यां नां दर्ता याःगुली बेल्जियमया रजनी प्रधान व डेनमार्कया श्रीया महर्जनया नां धाःसा विधि पूमवं धासें खारेज जूगु खः ।

डब्लुएनओया निर्वाचन समितिं आः सार्वजनिक याःगु थ्व नामय् सुयां दावी विरोध दुसा निवेदन बीत इनाप याःगु दु । यदि सुयां दावी विरोध मदुसा जुलाई १९ तारिखय् उम्मेदवारतय् अन्तिम नांधलः सार्वजनिक यायेगु ग्वसाः यानातःगु दु । सार्वजनिक जूगु नांयात कयाः आः तक सुंपाखें दावी विरोध मजूसां थुकी छम्ह हे मिसाम्ह पदाधिकारी दुमथ्याःगु खँय् धाःसा सामाजिक सञ्जालय् आलोचना यानाहःगु दु ।

वल्र्ड नेवाः अर्गनाइजेशनया प्यक्वःगु तःमुँज्या थ्वहे वइगु अगस्ट ५ निसें ७ तारिख तक अमेरिकाया न्यूयोर्कय् यायेगु तयारी जुयाच्वंगु दु । डब्लुएनओ यूएसए च्याप्टर व नेवाः गुथि न्यूयोर्कया मंकाः ग्वसालय् थ्व तःमुँज्या जुइत्यंगु खः । तःमुँज्याय् विश्वया थीथी देशय् च्वंपिं नेवाः प्रतिनिधितय्सं ब्वति काइगु खँ ग्वसाः खलकं धाःगु दु । थुकिया मूपाहां नेपाःया ख्यालिजुजु मदनकृष्ण श्रेष्ठ जुयादीगु नं क्वःछीधुंकूगु दु ।

थ्व स्वयां न्ह्यः हलिं नेवाः मुना बेलायतया लण्डन, अमेरिकाया पोर्टल्याण्ड व नेपाःया येँय् सम्पन्न जुइधुंकूगु दु ।

सम्बन्धित बुखँ

LEAVE YOUR COMMENTS