किपूया सांस्कृतिक विवरण सफू व लाखेपाः फल्चाया उलेज्या

किपू – किपू देय्या थीथी सांस्कृतिक पक्षयात कःघानाः तयार यानातःगु सांस्कृतिक विवरण सफू पितब्वज्या जूगु दु । किपू नगरपालिकाया निंतिं थीथी विज्ञतय् पुचलं अध्ययन यानाः तयार याःगु कीर्तिपुर नगरपालिकाया सांस्कृतिक विवरण सफू तयार याःगु खः ।

किपूया ऐतिहासिक, सांस्कृतिक व धार्मिक महत्वं जाःगु न्हय्गां जात्राया झ्वलय् लाकाः उगु सफू किपू नगरपालिकाया प्रमुख रमेश महर्जन व उपप्रमुख सरस्वति खड्कां मंकाःकथं पितब्वज्या यानादीगु खः । सफू पितब्वज्या स्वयां न्ह्यः न्हय्गां जात्राया छगू महत्वपूर्ण अंगकथं जुयाच्वंगु मौलिक संस्कृति लाखेपाः फल्चाया नं उलेज्या याःगु खः ।

उगु लाखेपाः फल्चाया नगरप्रमुख महर्जन व उपप्रमुख खड्कां मंकाःकथं यानादिसें फल्चाय् च्वंगु वहःपौया नं अनावरण यानादीगु खः ।
किपू नगरपालिकाया निंतिं किपूया सांस्कृतिक विवरण सफू प्रयागमान प्रधान व वज्रमुनि वज्राचार्यं अध्ययन व अनुसन्धान यानाः तयार यानादीगु खः ।

सफुलिइ किपू देय्या सांस्कृतिक महत्वं जाःगु दाफा, भजन, संस्कृति सम्बन्धी विवरण दुथ्यानाच्वंगु दु । सफू पितब्वज्या यासें नगरप्रमुख महर्जनं सफूया प्रकाशनं किपूयात अन्तर्राष्ट्रिय जगतय् तकं म्हसीकेत ग्वाहालि जुइगु विश्वास प्वंकादिल ।

सफूया च्वमि वज्राचार्यं उगु सफुलिइ दक्वं खँ दुथ्याना च्वंगु मदु धासें आः कीर्ति अध्ययन व अनुसन्धान मण्डल कीर्ति रिसर्च सेन्टरपाखें विस्तृत अध्ययन व अनुसन्धान यानाः मगाःमचाःयात पूवंकेगु जुइ धयादिल ।

मेम्ह च्वमि प्रधानं किपूया संस्कृति अध्ययन याइपिं व न्हू पुस्तायात थुगु सफुलिं गाक्कं ग्वाहालि याइगु विश्वास प्वंकादिल । ज्याझ्वःया कजि राजकमल महर्जन व किपू नगरपालिका भाषा, सांस्कृति, कला, सम्पदा विभागया संयोजक रमेशमान डंगोलं नं नुगःखँ तयादीगु खः ।

 

सम्बन्धित बुखँ

LEAVE YOUR COMMENTS