नेपाःया प्यंगू जिल्लाय् क्वःबुँइचा थ्यन, बाली नयेगु सुरु

येँ- नेपालय् नं क्वःबुँइचा खनेदुगु दु । म्हिगः भारतलिसे सतिक लाःगु नेपाःया प्यंगू जिल्लाय् क्वःबुँइचा खनेदुगु खः । नेपाःया बारा, पर्सा व सर्लाही जिल्लाय् सुथय् हे क्वःबुइँचा खनेदुगु खः । सर्लाही थ्यंगु क्वःबुँइचा हजारौंया ल्याखय् दुगु खँ धाःगु दु । उमिसं थन बाली नयेगु नं सुरु यायेधुंकूगु दु । सलार्ही थ्यंपिं क्वःबुँइचा ख्यायेगु निंतिं विषादी ह्वलेगु व द्यःमां थायेगु ज्या जूगु खँ धाःगु दु । सर्लाहीइ शुक्रवाः बहनी तक खनेमदुपिं शनिवाः सुथय् सवा छ बजे पाखे धाःसा ह्वात्त हे खनेदुगु खः ।

बाराय् क्वःबुइँचा खनेदयेवं कृषि ज्ञान केन्द्र बाराया प्रमुख जीतेन्द्र यादवं उकिया जानकारी कृषि मन्त्रालययात बिउगु खः । थन निजगढ व सिमराय् क्वःबुँइचा खनेदुगु खः । वा वयाच्वंबलय् दुहां वःगु जूगुलिं म्हिगः न्हिनय् तक थुमिसं बाली नयेगु सुरु मयानिगु खः । सिमराया सिमाय् छथ्वः क्वःबुँइचा लुइकागु खँ यादवं कनादीगु दु ।

क्वःबुँइचा अफ्रिकां अरबियन देय् जुयाः एसियाया इरान, अफगानिस्तान, पाकिस्तान, भारत जुयाः नेपाः थ्यंकः वःगु खः । करोडौंया ल्याखय् वइपिं थज्याःपिं क्वःबुँइचातय्सं छुं ईया दुने बाली पूवंक नष्ट यानाबीफुगु खँ विज्ञपिंसं धाःगु दु ।

आः नेपालय् थ्यंपिं क्वःबुँइचा भारतय् वयाच्वंगु पुचः पाखें छुटे जुया वःपिं खः कि व हे बथान थ्यंकः वःगु खः धयागु अनुसन्धान जुयाच्वंगु खँ धाःगु दु । आः वा वइगु मौसम लानाच्वंगुलिं क्वःबुँइचां तःधंगु क्षति मयाइगु खँ धाःसां थुकियात नष्ट यायेत धाःसा आः हे गम्भीर जुयाः लगे जुइमाःगु सुझाव नं बियाच्वंगु दु ।