ने. सं. ११४३ चौलाथ्व पारू -

कर्मचारीतय् मिलोमतोय् पशुपतिया दानपात्रं ध्यबा खुइगु आशंका

येँ (नेपालभाषा टाइम्स)- पशुपति विकास कोषया कर्मचारीतय् हे मिलोमतोय् पशुपतिइ तयातःगु दानपात्रय् च्वंगु ध्यबा खुइगु ज्या जुयाच्वंगु आशंका ब्वलंगु दु । वंगु माघ १४ गते दानपात्र तंगुयात कयाः छानविन यायेत दयेकूगु समितिया प्रतिवेदन आःतकं सार्वजनिक मयाःनिगुलिं थ्व आशंका तच्वःगु खः । थुगु घटनाया छानविन समितिया संयोजक नं दानपात्रया ध्यबा मिलोमतोय् हे अपचलन जुयाच्वंगु संकेत याःगु दु ।

घटना कथं वंगु माघ १४ गते पशुपतिया पश्चिम ध्वाखाय् तयातःगु दानपात्र तंगु खः । कोषया कर्मचारीत न्हियान्हिथं थें दानपात्रा चायेकत वंबलय् दानपात्र हे मदुगु खनेवं हल्लाखल्ला जूगु खः, तर हल्लाखल्ला जूगुया छुं घौ लिपा हे हाकनं दानपात्र अन हे तये हयातःगु लूगु खः । थ्व दानपात्र तंबलय् प्रहरी वयाः दानपात्र खुयायंकूगु धकाः मुचुल्का तकं उठे यायेधुंकूगु खः ।

दानपात्र तंगु घटनायात कयाः छानविन यायेत कोषया संचालक परिषद्या दुजः देवीप्रसाद बरालया संयोजकत्वय् न्हय्म्हु दुजः दुगु छगू समिति दयेकूगु खः । उगु समिति छानविनया प्रतिवेदन लःल्हायेधुंकूगु दु । तर कोषं आःतक छानविन प्रतिवेदन सार्वजनिक नं याःगु मदुनि, अले छानविन प्रतिवेदनय् दोषी धकाः आशंका यानातःपिं बारे थप छानविन जुइ कि जुइमखु धयागु नं छुं धाःगु मदुनि ।

थुकियात कयाः संस्कृति , पर्यटन तथा नागरिक उड्डयन मन्त्री सुदन किरातीं कोषया सदस्यसचिवयात प्रतिवेदन कार्यान्वयन बारे छु जुया च्वन धकाः कोषया सदस्यसचिव मिलन थापायात न्यने धुंकूगु दु, तर सदस्यसचिवं निन्हु दयेधुंकाः नं शुक्रवाः तक मन्त्रीयात छुं जानकारी मबिउनिगु खँ सीदुगु दु ।

पशुपतिया प्यगुलिं ध्वाखा पिने सिजःया टेप थें ज्याःगु दानपात्रा तयातःगु दु । थ्व दानपात्रय् स्वदेशी विदेशी भक्तजनपिंसं ध्यबा लिसें लुँवहया तिसा नं छानाथकेगु याइ । थज्याःगु दानपात्र छगलय् न्हि निगू लाख धयाथें ध्यबा दयेगु याः । थ्व दानपात्रा न्हियान्हिथं कोषया कर्मचारीतय्सं चायेकाः दानपात्रय् दुगु ध्यबा, लुँवह कोषया खाताय् जम्मा यायेगु याइगु खः । तर माघ १४ गते पश्चिम ध्वाखाय् च्वंगु दानपात्रा तनेवं कर्मचारीतय्सं कोषया सदस्यसचिव थापायात नं जानकारी बिउगु खः । दानपात्रा तंगु छुं ई लिपा हाकनं उगु हे थासय् दानपात्र तये हयातःगु लूगु खः । थ्वयां कन्हय् कुन्हु बरालया संयोजकत्वय् प्रहरी व सशस्त्र प्रहरीया प्रतिनिधिपिं तयाः छानविन समिति दयेकूगु खः ।

समितिया संयोजक बरालं धाःकथं उगु दानपात्रा खुयायंकूगु इलय् अन कभर याइगु सिसिटिभीया तार तकं चानातःगु खः । समितिं न्यनेकने यानास्वःबलय् न्हापा न्हापा नं थज्याःगु घटना जूगु आशंका ब्वलंगु नं वय्कलं जानकारी बिउगु दु ।

प्रतिवेदनय् कोषया संस्कृति संरक्षण महाशाखा व कर्मचारी प्रशासन महाशाखाया प्मुख लिसें कर्मचारीतय्सं जिम्मेवारी पूवंकूगु खनेमदुगु धासें उमित नं छानविन यानाः कारवाही यायेत सिफारिस यानागु खँ बरालं कनादीगु दु ।