आः माधव विरुद्ध ओली पक्ष

येँ (नेपालभाषा टाइम्स)÷सर्वोच्च अदालतया फैसला लिपा सत्ताच्युत जुयादीम्ह निवर्तमान प्रधानमन्त्री लिसें नेकपा (एमाले)या अध्यक्ष केपी शर्मा ओलीं पार्टीया वरिष्ठ नेता माधव नेपालया कडा आलोचना यानादीगु दु । अध्यक्ष ओलीं नेता नेपालयात गद्दार जूगु द्वपं समेत बियादीगु दु । नेता नेपालं थःगु हे पार्टीया सरकार क्वःथःगु धासें आः नेपालयात पार्टी दुने थाय् बी मफइगु खँ नं धयादीगु खः ।

प्रधानमन्त्री निवास बालुवाटार त्वःताः म्हिगः बालकोटस्थित थःगु छेँय् झाःम्ह ओलीं थःगु हे छेँया बार्दलीइ च्वनाः थः समर्थक कार्यकर्तातय्त सम्बोधन यासें थःत जालझेल यानाः चीकूगु व उकिया न्ह्यलुवा वरिष्ठ नेता नेपाल जूगुलिं वय्कः लाज शरम मदुम्ह नेता धकाः टिप्पणी यानादीगु खः ।

ओलीं कार्यकर्तापिंत सम्बोधन यानाच्वंगु इलय् वय्कःया समर्थकपिसं नेता नेपालयात गद्दार घोषणा यानाः पार्टी पिथेमाःगु माग यासें नारा थ्वयेकूगु खः । सम्बोधनया झ्वलय् ओलीं नेपालया लिउलिउ वंपिं नेता कार्यकर्तापिंत पार्टी दुने च्वनाः ज्या यायेगु खःसा मौका बीगु खँ धासें तर नेता नेपालया हकय् धाःसा आत्मालोचना, गल्ती कमजोरी स्वीकार यायेगु पक्षय् थः मदुगु खँ नं धयादिल ।

वय्कलं थःगु नेतृत्वया सरकार विकासया लँपुइ न्ह्यानाच्वंगु इलय् सरकार क्वःथलेगु ज्या याःगु धासें धयादिल, ‘माधव नेपाल थेंज्याःम्ह गद्दारयात गुगुं नं कथ क्षमा बीफइ मखु ।’

सर्वोच्च अदालतपाखें संसद पुन–स्र्थापनाया फैसला वये न्ह्यः ओली पक्ष व माधव नेपाल पक्षया कार्यदल च्वनाः १० बुँदाया छगू सहमति याःगु खः । तर सर्वोच्चया फैसला वयेधुंकाः ओलीं उगु सहमतियात पालना मयायेगु संकेत क्यना हःगु दु । नापं ओली पक्षया कार्यकर्तातय्सं माधव नेपालयात आः पार्टी दुने थाय् बी दइ मखु धकाः सः तयेगु याना हःगु दु । थुकिं यानाः माधव नेपालयात पार्टीं यानातःगु कारवाही लित कायेगु, पार्टीयात २०७५ या जेष्ठ २ गतेया अवस्थाय् लित यंकेगु धकाः जूगु सहमति नं फासांफुसुुं जूवंगु खँ धयाहःगु दु । आः एमाले एकताया भविष्य हानं अन्यौल जूवंगु दु ।

सम्बन्धित बुखँ

LEAVE YOUR COMMENTS