तालिबानय् विवाद जूगु मदु – नेता मुल्लाह बरादर

एजेन्सी- तालिबानया सह–संस्थापक नेता व अफगानिस्तानया अन्तरिम सरकारया उपप्रधानमन्त्री मुल्लाह अब्दुल गनी बरादरं भिडियो सन्देश जारी यानाः तालिबान दुने विवाद मजूगु धाःगु दु । नेता बरादरं थः स्वस्थ जूगु व घाःपाः जुल धकाः वयाच्वंगु समाचार असत्य खः नं धाःगु दु । थीथी सञ्चार माध्यमं तालिबानया नेतातय् दुने विवाद जूगु व विवादया झ्वलय् जूगु ल्वापुइ बरादर घाःपाः जूगु समाचार बिउगु खः ।

नेता बरादरं थ्व समाचारया खण्डन यासें तालिबानया दुने आन्तरिक कलह मदुगु व थः स्वस्थ जूगु धाःगु खः । नेता बरादर थः काबुलं पिने लानाच्वंगु व थः च्वंच्वनागु थासय् इन्टरनेट मदुगुलिं खण्डन यायेमखंगु धकाः नं धाःगु दु । तालिबानया नेता बरादर सार्वजनिक रुपं खनेमदयाच्वंगु खः ।

थ्वया हे दथुइ तालिबान सरकारं पूर्व सरकारी अधिकारीतपाखें छगू करोड २४ लाख डलर व लुँ जफत याःगु दु । अफगानिस्तानया केन्द्रीय बैंकं अफगानिस्तानया पूर्व उपराष्ट्रपति अमरुल्लाह सलेह व मेपिं वरिष्ठ अधिकारीतय्गु छेँय् नं ध्यबा व लुँ जफत यानागु धाःगु दु ।

थौकन्हय् पूर्व उपराष्ट्रपति अमरुल्लाह गन दु धयागु सीमदुनिसां उपराष्ट्रपति अमरुल्लाहया किजा रोहुल्लाह अजिजियात छुं न्हिं न्ह्यः तालिबानतय्सं स्यानाबिउगु वया छेँजःपिंसं धाःगु दु । बैंकं अफगान नागरिकतय्त राष्ट्रिय ध्यबा छ्यलेत नं इनाप याःगु दु ।