अर्जेन्टिनाया उपराष्ट्रपतिया छ्यं न्ह्यःने पेस्तोल, हत्याया कुतः असफल

एजेन्सी÷ अर्जेन्टिनाया उपराष्ट्रपति क्रिस्टिना फर्नान्डेजयात छम्ह बन्दकुधारीं स्यायेगु कुतः याःगु दु । उपराष्ट्रपति क्रिस्टिना फर्नान्डेजययात ब्राजिलया ३५ दँ दुम्ह उम्ह मनुखं गोली कायेकाः स्यायेत स्वःगु खः, तर गोली कयेत्यंबलय् वयागु बन्दुक जाम जूगुलिं उपरराष्ट्रपति बचे जूगु दु । अर्जेन्टिनाया राजधानी ब्यूनस आयर्सय् च्वंगु थःगु छेँ पिने समर्थकत नापलानाच्वंगु इलय् थ्व घटना जूगु खः ।

प्रहरीं बन्दुकधारीयात ज्वने धुंकूगु दु । सामाजिक सञ्जालय् उम्ह मनुखं उपराष्ट्रपतियात बन्दूक कयेकेत स्वयाच्वंगु भिडियो सार्वजनिक जूगु दु । उगु भिडियोय् हुलमुलया दथुइ वयाः उम्ह मनुखं उपराष्ट्रपतिया ख्वालय् बन्दुक हःगु खनेदु ।

सामाजिक सञ्चालय् वयाच्वंगु थीथी भिडियो मध्ये छगुलिइ बन्दुकधारीं उपराष्ट्रपतियात गोली कयेकेत्यंगु व अन दुगु भीडं उपराष्ट्रपतियात बचे यानाच्वंगु खनेदु ।

अर्जेन्टिनाया राष्ट्रपति अल्बर्टो फर्नान्डेजं धाःकथं बन्दुकय् न्यागः गोली दुगु व गोली कयेत्यंबलय् बन्दुक जाम जूगुलिं गोली चले मजूगु खः ।
थ्व घटना जूबलय् उपराष्ट्रपति क्रिस्टिना फर्नान्डेज अदालतं थःगु छेँय् लिहां वयाच्वंगु खः । उपराष्ट्रपति फर्नान्डेजयात न्हापा राष्ट्रपति जूगु इलय् भ्रष्टाचार याःगु द्वपं बियातःगु दु । तर फर्नान्डेजं धाःसा थ्व भ्रष्टाचारया द्वपं अस्वीकार यानावयाच्वंगु दु ।

थ्व घटना लिपा अर्जेन्टिनाया राष्ट्रपति अल्बर्टो फर्नान्डेजं राष्ट्रया नामय् सम्बोधन यासें बन्दूकधारीया निन्दा याःगु दु । थ्व घटनायात राष्ट्रपति फर्नान्डेजं सन् १९८३ इ लोकतन्त्र वयेधुकाः जूगु गम्भीर घटना धाःगु दु ।

राष्ट्रपति फर्नान्डेजं धाःगु दु, ‘झी दथुइ असहमति जुइफु, झी दथुइ गम्भीर असहमति जुइफु तर ‘हेट स्पिच’ बिइमजिउ, थुकिं हिंसा जन्म जुइ । लोकतन्त्रय् हिंसाया निंतिं थाय् मदु ।’

राष्ट्रपति फर्नान्डेजं जीवन, लोकतन्त्रया रक्षा व उपराष्ट्रपतिलिसे ऐक्यबद्धता व्यक्त यायेगु निंतिं धकाः अर्जेन्टिनाय् शुक्रवाः राष्ट्रिय बिदाया घोषणा नं याःगु दु ।

उपराष्ट्रपति क्रिस्टिना फर्नान्डेज सन् २००७ निसें २०१५ तक अर्जेन्टिनाया राष्ट्रपति जुइधुंकूम्ह खः । सन् २०१९ य् फर्नान्डेजं उपराष्ट्रपतिया चुनाव ल्वाःगु खःसा थःगु थासय् अल्बर्टा फर्नान्डेजयात हःगु खः । ६९ दँ दुम्ह उपराष्ट्रपति फर्नान्डेजयात भ्रष्टाचारया द्वपं पुष्टि जुल धाःसा १२ दँ तक जेल वा आजीवन राजनीतिइ प्रतिबन्ध जुइफु । थुकिया सुनवाइ जूगु मदुनि ।