निम्ह अध्यक्षतय् आरोप-प्रत्यारोप

येँ (नेपालभाषा टाइम्स) – नेपाल कम्युनिष्ट पार्टी (नेकपा) या म्हिगः निसें सुरु जूगु स्थायी समितिया बैठकय् निम्ह अध्यक्ष दथुइ थवंथवय् आरोपा प्रत्यारोपण यायेगु ज्या जूगु दु। बैठकय् न्ववायेगु झ्वलय् नेकपाया अध्यक्ष पुष्पकमल दाहालं प्रधानमन्त्री ओलीयाके अहंकार अप्वःगु द्वपं बियादीगु दुसा मेम्ह अध्यक्ष लिसे प्रधानमन्त्री केपी शर्मा ओलीं पार्टी दुने हे बहुमत व अल्पमत खेल शुरु जूगु धासें उकियात कयाः असन्तुष्टि प्वंकादीगु दु। वय्कलं गुटबन्दी व बहुमतया कासां यानाः हे पार्टी विभाजनया लँपुइ थ्यंगु खः धयादीगु दु ।

बैठकय् न्ववायेगु झ्वलय् अध्यक्ष दाहालं सरकार व पार्टीयात फाइदा जुइ ला धकाः थम्हं अध्यक्ष ओलीयात न्यादँ तक सरकार चले यायेगु सहमति यानागु खःसां नं ओली सहमतियात पालना मयाःगु द्वपं बियादीगु खः ।

मेखे प्रम ओलीं नं पार्टीं सरकारयात माक्व ग्वाहालि मजूगु धासें महाधिवेशन तक सहकार्य यायेगु सहमति मेम्ह अध्यक्षं पालना मयाःगु द्वपं बियादीगु दु। प्रम ओलीं धयादिल, ‘पार्टीइ आः नं गुटबन्दी व बहुमतया कासा जुयाच्वंगु दु। थुकिं अनुशासनहीन ज्या यानाच्वंगु दु।’

थःगु खँ तयेगु झ्वलय् अध्यक्ष दाहालं प्रम ओलीं सरकार चले यायेमफुगु द्वपं बियादीगु खःसा प्रम ओलीं धाःसा सरकारया बचाउ यायेगु कुतः याःगु खः । अध्यक्ष दाहालं पिनें पार्टी व सरकारयात असफल यायेगु कुतः याइगु स्वाभाविक जूगु धासें सरकारं ज्या याये मफुगु कारण आन्तरिक खः धयादीगु दु। वय्कलं पार्टी दुने थीथी गुट दुगु तर पार्टी मदुगु अवस्था ब्वलंगु धासें थुकिं सरकारय् दुपिंसं ध्यान बीमाःगु खँ नं वय्कलं धयादिल ।

अध्यक्ष लिसे प्रम ओली राजनीतिक दल विभाजनयात अःपुइकेत थम्हं हयागु अध्यादेश गलत मजूगु धासें पार्टीया पासापिंसं लितका धकाः धाःगुलिं जक थम्हं लित कयागु खः धयादिल ।

निम्ह अध्यक्षया सम्बोधन लिपा म्हिगः बैठक स्थगित जूगु दुसा कन्हय् हाकनं बैठक च्वनीगु खँ दु। कन्हय् या बैठकय् अमेरिकी मिलिनियम च्यालेन्ज (एमसीसी) या बारे पार्टीया आधिकारीक धारणा दयेकेगु बारे सहलह जुइगु सम्भावना दु। स्थायी समितिया आपालं दुजःपिंसं एमसीसीयात परिमार्जन यानाः जक पास यायेमाः धकाः अडान कयाच्वंगु दुसा सरकारय् दुथ्याःपिंसं धाःसा परिमार्जन मयासें पारित यायेमाः धकाः धायेगु यानाच्वंगु दु ।