फोरम नं सरकारय् वनीगु संकेत ,संविधान संशोधनय् वाम गठबन्धन लचक जूगु आभास

येँ – प्रदेश नम्बर २ लय् संसफोया नेतृत्वय् गठन जूगु प्रदेश सरकारयात एमाले व माओवादी सहितया वाम गठबन्धनं नं समर्थन याःगुलिं देय्या राजनीतिं हानं मेगु मोड काइगु संकेत खने दया वःगु दु । एमाले व माओवादीं प्रदेशय् ससफोया सरकारयात समर्थन याःगुलिं आः केन्द्रय् गठन जुइगु एमाले व माओवादीया सरकारयात नं ससफों समर्थन याइगु संकेत पिहां वःगु दु ।सूत्रतय्सं धाः कथं केन्द्रीय सरकारय् वाम गठबन्धनयात समर्थन यायेगु धकाः आः तक ससफों निर्णय याःगु मदुनि तर वाम गठबन्धनं संविधान संशोधन यायेगु खँय् सकारात्मक संकेत बिल धाःसा ससफों समर्थन याइगु निश्चित दुगु खँ धाःगु दु ।

सूत्रं धाः कथं २ नम्बर प्रदेशय् थःपिंत समर्थन याये माल धकाः ससंफों याःगु इनापयात स्वीकार यासें वाम गठबन्धनं समर्थन याःगु खः । आः संविधान संशोधन जुइबलय् राज्य पुनर्संरचना आयोगं बिउगु प्रतिवेदनय् आधारित जुयाः १० प्लस १ प्रदेश दुगु संघीय प्रणाली जुइमाः धकाः ससफो व राजपां माग याना वयाच्वंगु खःसां आः धाःसा थ्व निगुलिं पार्टी थ्व माग स्वयां कुहां वयेधुंकूगु दु ।सूत्रं धाः कथं आः राज्य पुनर्संरचना आयोगं बिउगु प्रतिवेदन लागू यायेगु सम्भव मदयेधुंकल ।

उकिं आः थथें थ्व प्रतिवेदन लागू याये मफुसां भविष्यय् वनाः प्रदेशया संख्या बढे यानाः यंके फइगु व्यवस्था संविधानय् याना बिउसां गाः धइगु न्हूगु लाइन न्ह्यःने वयाच्वंगु दुसा एमालेया छगू तह नेतात थुकी सहमत नं जुइधुंकूगु दु । यदि एमालें आःयात थुलि खँय् प्रतिवद्धता क्यन धाःसा लिपा जक संशोधन याःसां गाः धइगु लाइन ज्वनाः ससंफों वाम गठबन्धनया सरकारयात समर्थन याये फुगु खँ धाःगु दु । ससफों थुकिया लागिं एमाले व माओवादीया नेतातलिसे अलग अलग च्यानलं खँ न्ह्याकाच्वंगु सीदुगु दु ।

राष्ट्रपति–उपराष्ट्रपति पुलांपिं हे
देय्या न्हूम्ह राष्ट्रपतिया चुनाव फागुन २९ गते व उपराष्ट्रपतिया चुनाव चैत २ गते यायेगु तालिका पिकाःसां राष्ट्रपति व उपराष्ट्रपति निगुलिं पदय् आःयापिं हे मय्जु विद्या भण्डारी व भाजु नन्दबहादुर पुनयात हे दोहोरे याइगु जूगु दु । थ्व खँय् सहमति जूगुलिं माओवादीं राष्ट्रपतिया पदया थः दावेदार रामबहादुर थापायात सरकारय् छ्वइगु जूगु दु ।