नगरपालिका संघया अध्यक्षय् अशोक ब्याञ्जु

येँ – धौख्यः नगरपालिकाया प्रमुख अशोककुमार ब्याञ्जु श्रेष्ठया अध्यक्षताय् नेपाल नगरपालिका संघया न्हूगु ज्यासना पुचः ल्यःगु दु । संघया येँ जूगु खुक्वःगु राष्ट्रिय सम्मेलनं श्रेष्ठया अध्यक्षताय् पीगुम्हेसिया न्हूगु ज्यासना पुचः ल्यःगु खः ।

संघया उपाध्यक्षय् बेलकोट नगरपालिकाया उपप्रमुख कबिता ढुंगाना, महासचिवय् नीलकण्ठ नगरपालिकाया प्रमुख भीम ढुंगाना, उपमहासचिवय् जनकपुर उपमहानगरपालिकाया प्रमुख लालकिशोर शाह, कोषाध्यक्षय् तुलसीपुर उपमहानगरपालिका दाङया प्रमुख घनश्याम पाण्डे व सहकोषाध्यक्षय् येँ महानगरपालिकाया उपप्रमुख हरिप्रभा खड्गी श्रेष्ठ निर्वाचित जुयादीगु दु ।

वंगु भदौ १२ निसें १४ गतेतक थन जूगु सम्मेलनं संघया प्रदेश संयोजक नं क्वःछिउगु दु । प्रदेश नं १ या संयोजकय् इलाम नगरपालिकाया प्रमुख महेश बस्नेत, प्रदेश नं २ या संयोजकय् परोहा नगरपालिका रौतहटया प्रमुख शेख वकिल, प्रदेश नं ३ या संयोजकय् भीमेश्वर नगरपालिकाया प्रमुख भरत केसी, गण्डकी प्रदेशया संयोजकय् पालुङटार नगरपालिकाया प्रमुख दीपकबाबु कँडेल, प्रदेश नं ५ या संयोजकय् बुटवल उपमहानगरपालिकाया प्रमुख शिवराजा सुवेदी, कर्णाली प्रदेशया संयोजकय् नारायण नगरपालिका दैलेखया प्रमुख रत्नबहादुर खड्का व प्रदेश नं. ७ या संयोजकय् पाटन नगरपालिकाया प्रमुख केशरबहादुर चन्दयात ल्यःगु दु । सम्मेलनय् खुगू महानगरपालिका, झिंछगू उपमहागनरपालिका व २७६ गू नगरपालिकाया प्रमुख व उपप्रमुखया सहभगिता दुगु खः ।