सरकारय् वनेत जसपाया समस्या

येँ – जनता समाजवादी पार्टी (जसपा) दुने ब्वलनाच्वंगु विवादयात कयाः ग्वाहालि यायेगु निंतिं अध्यक्ष महन्थ ठाकुरं प्रधानमन्त्री केपी शर्मा ओलीयात इनाप यानादीगु खँ सीदुगु दु ।

म्हिगः अध्यक्ष ठाकुर व प्रधानमन्त्री दथुइ जूगु वार्ताया झ्वलय् प्रधानमन्त्री केपी शर्मा ओलीं वय्कः–पिंत सरकारय् दुहां वयेत इनाप यानादीगु खःसा उकिया लिसलय् अध्यक्ष ठाकुरं उगु इनाप यानादीगु खः । प्रमलिसे खँ ल्हायेगु झ्वलय् अध्यक्ष ठाकुरं थौंकन्हय् पार्टी दुने विवाद जुयाच्वंगुलिं आः हे सरकारय् वनेगु खःसा पार्टीया विवाद अझ अप्वया वने फइगु खँ धासें पार्टीया विवाद समाधान लिपा जक
सरकारय् वनेगु खँ धयादीगु खः ।

पार्टीया विवाद समाधान मजुइकं सरकारय् वनेबलय् पार्टी दुने थःपिंत कारबाही याये फइगु सम्भावना दुगुलिं तत्काल सरकारय् वने मफइगु खँ धासें यदि थःपिं सरकारय् वनेमाल धाःसा पार्टी तछ्याये मालीगु अवस्था वयेफइगु जूगुलिं राजनीतिक दल सम्बन्धी ऐन संशोधन यानाः जक सरकारय् वनेत थःपिं तयार दुगु लिसः अध्यक्ष ठाकुरं बियादीगु खः ।

थौंकन्हय् दल तछ्यायेगु निंतिं पार्टीया केन्द्रीय समितिइ ४० प्रतिशत थ्यंकेमाःगु प्रावधान दु तर जसपाया केन्द्रीय कार्यकारिणी समितिइ थःपिनिगु बहुमत मदुगुलिं अध्यादेशपाखें संविधान संशोधन यायेत इनाप यानादीगु खः । थ्व स्वयां न्ह्यः जसपाया कार्यकारिणी समितिं सरकारय् वन धाःसा पार्टीया सदस्य स्वतः रद्द जुइगु निर्णय यानातये धुंकूगुलिं अध्यक्ष ठाकुरयात सरकारय् वनेत समस्या जुयाच्वंगु दु ।

जसपाया मेम्ह अध्यक्ष उपेन्द्र यादवं थ्व स्वयां न्ह्यः कार्यकारिणी समितिया बैठक सःताः सरकारय् ब्वति काइपिं नेता व कार्यकर्तातय् पार्टी सदस्यता स्वतः रद्द जुइगु निर्णय यानातःगु खःसा उकिया ग्याःचिकुं यानाः हे अध्यक्ष ठाकुर पक्षया नेतात सरकारय् वनेत ग्यानाच्वंगु खँ सूत्रं धाःगु दु ।

म्हिगः अध्यक्ष ठाकुर व प्रम ओली दथुइ जूगु बैठकय् जसपाया नेतात सरकारय् समावेश जुइगु खःसा च्याम्ह फुल मन्त्री व निम्ह राज्य मन्त्री बीगु प्रस्ताव याःगु खः । उकथं हे म्हिगः जूगु सहलह ज्याझ्वलय् मधेश आन्दोलन व थरुहट आन्दोलनय् ज्वनातःपिं नेता कार्यकर्ताया मुद्दा लित कायेगु बारे नं सहलह जूगु खः ।

मन्त्रालय यक्व दु, पोखरेल धाःसा खाली
थौंकन्हय् सरकारय् महत्वपूर्ण मन्त्रालयत खाली जुयाच्वंगु दु । तर सरकारय् उपप्रधानमन्त्री समेत जुया च्वनादीम्ह ईश्वर पोखरेलयात धाःसा आः तकं छुं मन्त्रालय बिउगु मदुनि । सूत्रतय्सं धाः कथं रामबहादुर थापाया पद वनेधुंकाः ईश्वर पोखरेलं गृह मन्त्रालय कायेत कुतः यानादीगु खः । तर वय्कःया विरुद्ध पुलांम्ह सभामुख सुवास नेम्बाङं लबिङ याःगुलिं प्रम ओलीं मन्त्रालय मबिउगु खँ धाःगु दु । पोखरेल थौंकन्हय् बिना विभागीय उपप्रधानमन्त्री खः ।

सम्बन्धित बुखँ

LEAVE YOUR COMMENTS