रेशम चौधरीयात येँय् हल

येँ – कैलाली जेलय् आमरण अनसन च्वँच्वं हे बेहोश जूम्ह राजपाया सांसद रेशम चौधरीयात म्हिगः हेलिकप्टरय् तयाः येँय् हःगु दु । गृहमन्त्री रामबहादुर थापा ‘बादल’ या निर्देशन कथं चौधरीयात वासः याकेत येँय् हःगु खः । टीकारपुर घटनाय् दोषी धकाः ज्वनाः कुनातःपिं २४ म्ह थारू कैदीतय्सं मंकाः कथं अनसन च्वंगु खःसा वंगु प्यन्हु न्ह्यवंनिसें रेशम चौधरी धाःसा आमरण अनसनय् दीगु खः । अनसन च्वँच्वं वय्कः बेहोश जूगु खःसा अवस्था चिन्ताजनक खने दुगुलिं वासः याकेत येँय् हःगु खः । चौधरीया पिसाबय् समेत हि पिहां वःगु खँ धाःगु दु ।

चुनावय् त्याःसां इन्टरपोलं समेत मालाच्वंम्ह सांसद नवराज सिलवालयात सपथ ग्रहण याके बिल तर थःत धाःसा चुनावय् त्याःसां सपथ ग्रहण मयाकू धासें टीकापुर घटनाया सकलें बन्दीतय्त त्वःतेमाःगु माग यासें जेल दुने हे वय्कःपिं अनसन च्वंगु खः । राजपाया अध्यक्ष मण्डलया दुजःतय्सं नं म्हिगः गृहमन्त्री थापायात नापलानाः चौधरीया माग पूरा यायेमाःगु खँय् ध्यानाकर्षण याःगु खः । चौधरीं अदालतय् आत्मसमर्पण याःगु खः ।