नेपाः दंगु सामानया डम्पिङ साइट

येँ – नेपाः विश्वन्यंकंया दंगु सामान डम्पिङ यायेगु थाय् जुयाच्वंगुलिं आः अज्याःगु सामानया आयातय् प्रतिबन्ध तइगु जूगु दु । अर्थ मन्त्रालयं दंगु सामानया आयातं ब्यापार घाटा नं अप्वयाच्वंगु धासें अज्याःगु सामानया आयात बारे अध्ययन यायेत दयेकूगु समितिं प्रतिवेदन बीवं उकियात नियन्त्रण यायेगु तयारी यानाच्वंगु खँ सीदुगु दु ।

समितिया प्रतिवेदनय् म्वाःमदुगु सामान आयातय् बन्देज तयेगु, विलाशी वस्तु आयातय् नियन्त्रण यायेगु सुझाव नं बियातःगु दु । मनोरञ्जनया निंतिं नेपाःमित विदेश वनेगु कम याये माःगु सुझाव नं उकी बियातःगु दु ।

नेपाः चाःहिउ वइपिं पर्यटकतय्सं थःपिनि भुक्तानी विदेशय् याइगु जूगुलिं अज्याःगु भुक्तानी आः नेपाःया बैंकपाखें छ्वया हयेमाःगु व्यवस्था यायेत नं धाःगु दु । स्वंगूगु मुलुकं आयात जुइगु सामानया बीमा विदेशी बीमा कम्पनीं यानाच्वंगुली आः अज्याःगु बीमा नेपाःया हे बीमा कम्पनीं यायेमाःगु सुझाव नं प्रतिवेदनय् बियातःगु खँ सीदुगु दु ।