ने. सं. ११४४ कछलागा षष्ठी -

भारतय बर्डफ्लु खनेदत

एजेन्सी – भारतया थीथी सहरय् हँय् व क्वःयाके एभिअन फ्लु (बर्ड फ्लु) खने दयेवं अन द्वलंद्वः पंक्षीतय्त स्यायेगु सुरु याःगु दु। थीथी राज्यय्झं गःपंक्षीत यक्व मात्राय् सीगु खनेदयेवं छवाः न्ह्यः थन बर्ड फ्लु खनेदुगु सिइकूगु खः । थ्व भाइरसं मेमेपिं प्रजातिया पंक्षीतय्त नं लिच्वः लाकूगु खँ धाःगु दु ।

भारतया केन्द्रीय सरकारं फ्लु न्यना मवनेमा धकाः उच्च सतर्कता नालाः आपतकालिन उपायत नालेगु खँ धाःगु दु। मनूतय्त सीपिं वा बिरामी खनेदुपिं पंक्षीतय्त मथीत धाःगु दु। कोरोना भाइरस महामारी आक्रान्त जुयाच्वंगु भारतय् कोरोनाया खोप बीगु सुरु यायेत्यंगु इलय् हाकनं पंक्षीपाखें सरे जुइगु मेगु भाइरस खनेदुगु खः ।

छुं छुं जिल्लाय् हँय्, खाया ला मीगु पसः नं बन्द याकूगु दुसा ख्येँ मिइगु नं प्रतिबन्ध तःगु दु। उत्तरी राज्य हिमाञ्चल प्रदेशय् साइबेरिया व मंगोलियापाखें बसाइ सराइ जुयाच्वंपिं थ्यंमथ्यं २४०० झंगःत सिनाच्वंगु अवस्थाय् लुइकूगु खः । अथेहे केरलाय् नं १२ हजार हँय्त सिइवं थन बर्ड फ्लुया संक्रमण जूगु धासें बिरामी खनेदुपिं पंक्षीतय्त स्यायेगु सुरु याःगु खः ।

अथेहे मध्य प्रदेशय् वंगु झिन्हु न्ह्यः सलंसः क्वः सिनाच्वंगु लुइकूगु खःसा थ्व लिपा बकुला व वाउँभत्तुयाके नं ल्वय् खनेदुगु खः । अथेहे इन्दोरय् ५० म्हं मल्याक क्वःत सिइवं स्थानीय अधिकारीतय्सं मनूतय्के नं सेखं ज्वर वःगु दु कि मदु धयागु जाँच यानास्वःगु खः । अथेहे हरियाण, गुजरात व राजस्थानय् नं उच्च सतर्कता नालाः निगरानी तयाच्वनागु खँ सरकारं धाःगु दु ।