ने. सं. ११४६ तछलाथ्व दशमी -

नेपाः-भारत सीमा विवाद : भारतं तत्काल वार्ता मयाइगु

येँ – सीमा विवादयात कयाः नेपाः व भारतया दथुइ तत्काल वार्ता जुइगु सम्भावना मदुगु खँ सीदुगु दु । नेपाल सरकारं वंगु मे २० तारिख कुन्हु लिम्पियाधुार, लिपुलेक व कालापानी दुथ्याकाः थःगु नक्सायात संशोधन यायेगु लिसें निशान छाप परि मार्जन यायेधुंकाः भारतं नेपाः लिसे तत्काल वार्ता मयायेगु रणनीति दयेकूगु खँ सीदुगु दु ।

नेपालं थःगु नक्सा परिमार्जन याये धुंकाः भारतया विदेश मन्त्रालयं छगू विज्ञप्ति जारी यानाः नेपाः-भारत सीमा विवाद वार्ता समाधान यायेगु समझदारी उल्लंघन याःगु द्वपं बिउगु खः ।

प्यन्हु न्ह्यः १२ जुनय् भारतीय प्रधानमन्त्री निवासय् जूगु क्याबिनेट कमिटी अन सेक्युरिटी (सीसीएस) बैठकय् आःया अवस्थाय् सीमाया विषययात कयाः नेपाल लिसे वार्ता यायेगु अर्थ मदुगु निष्कर्ष पिकाःगु खँ भारतीय सञ्चारमाध्यमं धाःगु दु । उगु बैठकं नेपाः संविधान संशोधनयात कयाः गुगुं नं कथंया प्रतिक्रिया बीम्वाःगु व वार्ताया तिथि क्वःछीम्वाःगु निष्कर्ष नं पिकाःगु खँ भारतीय सञ्चार माध्यमं न्ह्यथंगु दु ।

भारतं नेपाःलिसे कारोना भाइरस नियन्त्रण मजूतले वार्ता मयायेगु निष्कर्ष पिकाःगु खः । कोरोना नियन्त्रण जुइधुंकाः उगु ईया अवस्था स्वयाः जक भारतं नेपाः लिसे वार्ता यायेगु वा मयाये गु निर्णय याइगु खँ धाःगु दु ।

नेपालं भारत लिसेया सन्धि-सम्झौता एकतर्फी रुपं खारेज याये फइगु सम्भावना तकं दुगु व उकिया निंतिं तयार जुयाच्वनेत बैठकय् ब्वति काःपिंत भारतीय प्रधानमन्त्री नरेन्द्र मोदी निर्देशन बिउगु खः । प्रम मोदी नेपाः-भारत दथुइ जुयाच्वंगु सन्धि-सम्झौतां नेपाःयात हे फाइदा जुयाच्वंगु विश्लेषण यासें नेपालं सम्झौता खारेज याःसां भारतयात छुं लिच्वः मलाइगु विश्लेषण नं याःगु खँ धाःगु दु । उगु बैठकय् प्रम मोदी, गृहमन्त्री अमित शाह, रक्षामन्त्री राजनाथ सिंह, राष्ट्रिय सुरक्षा सल्लाहकार अजित डोभाल, वित्तमन्त्री निर्मला सीतारमण व चिफ अफ डिफेन्स स्टाफ विपिन रावत दुथ्याःगु खँ भारतीय समाचार माध्यमं न्ह्यथंगु दु ।

मोदीं ईपीजी प्रतिवेदन लः ल्हाना मकाइगु
नेपाः व भारतया प्रवुद्धवर्ग दुथ्याःगु कमिटी तयार याःगु ईपीजी प्रतिवेदन नं भारतीय प्रधानमन्त्री नरेन्द्र मोदीं लःल्हानाः मकाइगु खँ सीदुगु दु। नेपालं ईपीजी प्रतिवेदन लःल्हानाः कायेत भारतया धया वयाच्वंगु दु। प्रवुद्ध वर्ग दुथ्याःगु कमिटीं तयार याःगु प्रतिवेदन दकलय् न्हापां भारतया प्रधानमन्त्री मोदीयात लःल्हायेगु व वयां लिपा नेपाःया प्रधानमन्त्री केपी शर्मा ओलीयात लःल्हायेगु कथं सहमति जूगु खः । तर भारतया प्रम मोदीं धाःसा ईपीजी प्रतिवेदन लःल्हानाः कायेत ताः ई निसें आनकानी याना वयाच्वंगु दु ।