अध्यादेशं कानुन हइगु

येँ (नेपालभाषा टाइम्स)÷थीथी प्रदेशतय्सं ताः ई न्ह्यवंनिसें माग याना वयाच्वंगु संघीय निजामती व संघीय प्रहरी सम्बन्धी ऐन आः अध्यादेश मार्फत जूसां हयेगु मनःस्थिति प्रधानमन्त्री पुष्पकमल दाहालं दयेकादीगु दु । थ्व ऐन याकनं जारी मयात धाःसा आन्दोलनय् कुहां वयेगु जुइ धकाः थीथी प्रदेशया मुख्यमन्त्रीतय्सं बियाच्वंगु अल्टिमेटम नं आः क्वचाइगु अवस्थाय् थ्यंगुलिं प्रम दाहाल अध्यादेश मार्फत जूसां ऐन हयेगु निष्कर्षय् थ्यंगु खँ धाःगु दु ।

म्हिगः वालुवाटारय् च्वंगु समाज– वादी मोर्चाया बैठकय् नं थुकियात कयाः विशेष चर्चा जूगु खः । बैठकय् सहभागी जसपाया सह–अध्यक्ष राजेन्द्र श्रेष्ठं कनादीकथं प्रदेशतय्त आवश्यक जूगु कानुन दयेका मबिउगु कारणं प्रदेशं बांलाक ज्या याये मफुगु व ज्या मयाःगु कारणं यानाः प्रदेश संसद धइगु तलब बियाः लहिना तयेमाःगु बोझ थें जक जुल धइगु सन्देश वंगु कारणं नं याकनं हे कानुन दयेमाःगु आवश्यक जूगु खः । मोर्चाया नेतातय्सं प्रम दाहालयात थ्व बरु अध्यादेश मार्फत हे हःसां जिउ धकाः सुझाव बिउगु व प्रमं उकियात स्वीकार यानाः थःगु नं वहे बिचाः खः धकाः स्वीकृत क्यंगु खँ नं धाःगु दु ।

थ्व सम्बन्धी कानुन हयेगु लागिं संसद बैठक च्वनेमाःगु खःसां आः तुरुन्त संसद सःते फइगु अवस्था मदुगु जुयाः अध्यादेशपाखे हे वने मालीगु संकेत नं प्रम दाहालं बियादीगु खँ धाःगु दु । प्रतिनिधिसभाया सभामुख व राष्ट्रियसभाया अध्यक्षं आः राष्ट्रिय सभाया चुनाव लिपा जक संसद अधिवेशन सःते फइगु खँ प्रमयात धाःगु दु । राष्ट्रियसभाया चुनाव माघ ११ गते यायेत्यंगु दु । राष्ट्रिसभाया १९ म्ह दुजः ल्ययेगु लागिं थ्व चुनाव यायेत्यंगु खः ।

सामान्य नियम कथं नं न्हापांगु संसद क्वचाःगुयां खुला लिपा जक मेगु संसद सःतेफइ । लिपांगु चुनाव वंगु कार्तिकं क्वचाःगु जुयाः आः वैशाखं जक मेगु संसद अधिवेशन सःते फइ । उकिं संसद अधिवेशन सःतेगु ज्या लिबाइगु खने दुगुलिं अध्यादेशपाखे वने मालीगु सम्भावना अप्वयाच्वंगु खँ धाःगु दु । खास यानाः प्रतिनिधिसभा व राष्ट्रियसभा निथासं एमाले प्रमुख जुयाच्वंगुलिं थ्व कानुन हयेत संसदं ग्वाहालि याइ धइगु सम्भावना म्हो जक खनेदुगुलिं प्रम दाहालं अध्यादेशया विकल्पबारे बिचाः यानाच्वंगु खँ नं धाःगु दु ।

संघीय निजामती ऐन व प्रहरी ऐन मवःगु कारणं प्रदेशतय्सं थःत आवश्यक जूपिं कर्मचारी व प्रहरी नियुक्त यायेगु ज्या तकं याये फयाच्वंगु मदुनि । कर्मचारी मदयाः प्रदेश सरकारतय्सं निर्धारित ज्या तकं याये मफुगु गुनासो यक्व वयाच्वंगु दु ।

सम्बन्धित बुखँ

LEAVE YOUR COMMENTS