‘कोशी’ विरुद्ध संसद केन्द्रित संघर्ष
येँ (नेपालभाषा टाइम्स)- प्रदेश १ य् बजेट अधिवेशन च्वनीगु जुइवं ‘कोशी’ नामाकरण विरुद्ध आन्दोलन याना वयाच्वंगु पुचःतय्सं प्रदेशया राजधानी विराटनगर केन्द्रित आन्दोलन न्ह्याकीगु जूगु दु ।
१ नम्बर प्रदेश पुनः नामाकरण संघर्ष समितिं विराटनगर केन्द्रित आन्दोलन घोषणा याःगु खः । म्हिगः छगू विज्ञप्ति जारी यासें समितिं जेठ १४ गतेनिसें थुकथंया आदोलन न्ह्याकेगु जानकारी बिउगु खः । वंगु फागुन १७ गते प्रदेशसभा बैठकं प्रदेशया नां कोशी तःगु खःसा पहिचान पक्षधरतय्सं उकिया विरुद्ध आन्दोलन न्ह्याकूगु खः ।
पहिचान पक्षधरतय्सं आन्दोलन तच्वयेका यंकेवं प्रदेशसभाया बैठक तकं मच्वँसे न्हापांगु अधिवेशन चैत २९ गते अन्त्य याःगु खः । अनया प्रदेश सरकारं जेठ १४ गते बजेट अधिवेशन सःतूगु दु ।
थ्वहे झ्वलय् नेपाली कांग्रेस कोशी प्रदेश संसदीय दलं आन्दोलन याना वयाच्वंगु पक्षलिसे तत्काल वार्ता यायेत इनाप याःगु दु । म्हिगः विज्ञप्ति पिकासें कांग्रेस कोशी प्रदेश संसदीय दलं आन्दोलन याना वयाच्वंगु पक्षयात सःताः वार्ता यायेत प्रदेश सरकारयात इनाप याःगु खः ।
विज्ञप्तिइ कोशी प्रदेशया नांयात कयाः आन्दोलन याना वयाच्वंगु प्रदेश १ नम्बर नामांकन संघर्ष समितियात नं शान्तिपूर्ण व संयमित जुयाः थःगु माग तयेत इनाप याःगु दु ।
संघर्ष समितिं थ्व स्वयां न्ह्यः प्रदेशया मुख्यमन्त्री, मन्त्री व सांसदतय्त बहिष्कार यायेगु घोषणा यायेधुंकूगु दुसा उमित प्रदेश दुनेया होटेल लगायत छुं नं थासय् बाय् मबीत नं स्थानीय होटेल व्यवसायीतय्त आह्वान याःगु दु ।
LEAVE YOUR COMMENTS