प्रदेश २ – नां मधेस, राजधानी जनकपुर

येँ – प्रदेश नम्बर २ या स्थायी राजधानी जनकपुरय् तयेगु व प्रदेशया नां ‘मधेश’ तयेगु तयारी जुयाच्वंगु खँ प्रदेशया मुख्यमन्त्री लालबाबु राउतं कनादीगु दु । म्हिगः छगू पत्रकार सम्मेलनय् न्ववासें वय्कलं थ्व खँ कनादीगु खः । लिसें वय्कलं प्रदेशया स्थायी राजधानी व प्रदेशया नामाकरणयात कयाः संसद दुने सहमति जुइधुंकूगु दावी नं यानादिल ।

मुख्यमन्त्री राउतं थौंकन्हय् थीथी कोणं संघीयतायात असफल यायेगु कुतः जुयाच्वंगु दु धासें संघीय सरकारं थीथी कानून हयाः धमाधम प्रदेशया अधिकार कटौती यानाच्वंगु द्वपं नं बियादिल ।

वय्कलं नेपालय् संघीयता सफल जुइ वा मजुइ धइगु प्रदेश नम्बर २ या सफलता व असफलतालिसे तप्यंक स्वापू दुगु खँ खः धासें संघीयता ल्यंकेगु ज्या आः प्रदेशया ब्वहलय् वःगु खँ कनादिल ।

थ्वहे झ्वलय् प्रदेश २ या सत्ता साझेदार दल राष्ट्रिय जनता पार्टी (राजपा) या नेता कार्यकर्तातय्सं थःगु हे दलया मन्त्रीयात हाखः इलेगु कुतः याःगु दु । प्रदेशया सामाजिक विकास मन्त्री नवलकिशोर साहयात म्हिगः सुथय् हाखः इकेगु कुतः याःगु खः । मन्त्री साह निजी अस्पतालया ज्याझ्वलय् ब्वति कायेत वनाच्वंगु इलय् वय्कःया थःगु हे पार्टीया कार्यकर्तातय्सं वय्कःयात हाखः इकेगु कुतः याःगु खः । उगु इलय् प्रहरीं हस्तक्षेप यानाः झिम्ह स्वयां अप्वः कार्यकर्तायात ज्वंगु दु । स्थानीय कार्यकर्तात मन्त्री साहया ज्याखँयात कयाः असन्तुष्टि प्वंका वयाच्वंगु खः ।

प्रदेश २ लय् सरकारया समीकरण हिलीगु चर्चा जुयाच्वंसां राजपाया सांसद रेशम चौधरीयात अझ नं कुनातःगु कारणं संघीय सरकारया सत्तारुढ दल नेकपालिसे गठबन्धन यायेत थाकुयाच्वंगु खँ धाःगु दु ।