ससफो सांस्कृतिक महासंघया ३ नं प्रदेश तदर्थ कमिटी

यल – संघीय समाजवादी फोरम (ससफो) नेपालया संघीय सांस्कृतिक महासंघया प्रदेश नं. ३ तदर्थ समिति गठन याःगु दु । माघ २३ गते जूगु छगू ज्याझ्वःया दथुइ महासंघया ३ नं. प्रदेशया तदर्थ समिति गठन याःगु खः । महासंघया महासचिवलिसें प्रदेश नं. ३ या इन्चार्ज रहर तामांगया अध्यक्षताय् जूगु मुँज्याया उलेज्या मूपाहां पार्टी सहअध्यक्ष राजेन्द्र श्रेष्ठं यानादीगु खः ।

ज्याझ्वलय् नवासें प्रतिनिधिसभाया सांसदतकं जुयाच्वनादीम्ह श्रेष्ठं सांस्कृतिक क्षेत्रया संगठन जक दयेका वनेगु मखसे संगठनयात चलायमान नं याना वनेमाःगु खँय् बः बियादिल । लिसेंवय्कलं संगठनयात डेन्टिंग पेन्टिंग जक यानाः तयातयेगु मखसे इञ्जिन हे बल्लाकाः न्ह्यःने यंकेत नं इनाप यानादिल ।

‘पार्टीया विचाः, संगठन व राजनीतिक कार्यदिशा क्वःजीवं कार्यकर्तातय् भूमिका प्रमुख जुइ’ सहअध्यक्ष श्रेष्ठं धयादिल, ‘झीत डेन्टिंग–पेन्टिंग यानातःगु संगठन मखु, बल्लाःगु इन्जिन दुगु संगठन माःगु दु । संगठनयात सुदृढ यानाः न्ह्याः वनेगु निंतिं द्वन्द्व व्यवस्थापन यानाः न्ह्याः वनेमाः ।’ पार्टीया विचारधारा हे संघीय समाजवाद जूगु खँय् बः बियादिसें थुकियात न्ह्यःने यंकेगु इन्जिन धइगु संगठन खः धयादिल ।

भेलाय् पार्टी केन्द्रीय दुजःलिसें ३ नं. प्रदेशया उपाध्यक्षद्व न्हुछेलाल महर्जन, विद्युत वज्राचार्य, महासंघया अध्यक्ष घनराज सुब्बा, केन्द्रीय परिषद् दुजः हिरालाल भुजेल, सविफो केन्द्रीय दुजः अशोक राई लगायतं भिंतुना न्वचु बियादीगु खः ।महासंघया केन्द्रीय दुजः मनिष श्रेष्ठया अध्यक्षताय् नीस्वंगु झिंस्वम्हेसिया तदर्थ समितिया उपाध्यक्षय् इन्दु शाही, सचिवय् निर्मल लामा व कोषाध्यक्षय् सुष्मा सिख्राकार च्वनादीगु दु ।