यल भिंद्यःया देगः दने सिधल

यल- थनया भिंद्यःया देगः पुनःनिर्माण क्वचाःगु दु । २०७२ सालया गोरखा भुखाचं क्षति जूगु देगः करिब स्वदँ बिकाः दयेकूगु खः ।
विश्व सम्पदाया धखलय् दुथ्यानाच्वंगु यल लाय्कुलिइ च्वंगु देगः दने सिधःगु लसताय् वंगु शनिवाः छगू विशेष पुजा व होम याःगु खः ।

ठेक्कापाखें मखसे अमानतं देगः दनेमाःगु सः थ्वयेवं स्थानीय समुदायया सहभागिताय् भिमसेन मन्दिर पुनःनिर्माण सरोकार समितिपाखें देगः पुनःनिर्माणया ज्या न्ह्याकूगु खः ।

भुखाचं देगःया च्वय्या तँय बांमलाक क्षति याःगु खः । क्षति जूगु देगः भारत सरकारं पुनःनिर्माण यायेगु जिम्मा काःगु खःसां नंं छुं चिउताः मतयेवं स्थानीयं देगः दनेगु सरोकार क्यनाः पुनःनिर्माणया ज्या न्ह्याकूगु खः ।

देगः दनेत दकलय् न्हापां ललितपुर उद्योग वाणिज्य संघं १० गू लख दां ‘सिट मनि’ तयाः पुनःनिर्माणया ज्या न्ह्याकूगु खःसा देगः दने सिधःबलय् तकया दुने ४ गू करोड ९३ गू लख खर्च जूगु समितिं जानकारी बिउगु दु ।

देगः पुनःनिर्माणया निंतिं एभरेष्ट बैकया अध्यक्ष बीके श्रेष्ठ, इन्भेष्टमेन्ट बैंक व यल महानगरपालिकां छगू छगू करोड तका ग्वाहालि याःगु खःसा यल क्षेत्र नं. २या सांसद कृष्ष्णलाल महर्जन, क्षेत्र नं. ३ या सांसद पम्फा भुसालं निर्वाचन क्षेत्र पूर्वाधार विकास कार्यक्रम व बागमति प्रदेश सांसद ज्ञानेन्द्र शाक्यं सांसद विकास कोषपाखें ग्वाहालि याःगु खः ।

सम्बन्धित बुखँ

LEAVE YOUR COMMENTS