रेलमार्गया खँ ल्हायेत चिनिया पुचः वइगु

येँ – केरुङ–येँ रेलमार्ग बारे सहलह यायेत डिसेम्बर निगुगू वालय् चिनिया पुचः नेपाः वइगु जूगु दु । चीन व नेपाःया सचिवस्तरीय स्वक्वःगु बैठकय् ब्वति कायेत चिनियाँ पुचः नेपाः वयेत्यंगु खः । केरुङ–येँ रेलमार्गया प्रारम्भिक सम्भाव्यता अध्ययन जुइधुंकूगु दु । आः विस्तृत परियोजना प्रतिवेदन (डीपीआर) दयेकेगु ज्या ल्यं दनि ।

प्रारम्भिक अध्ययन कथं रेलमार्ग दयेकेत २ खर्ब ५७ अर्ब तुइगु खँ धाःगु दु । रेलमार्गया ९९ प्रतिशत धयाथें ब्व सुरुङ व तां दयेकेमालीगु खँ धाःगु दु ।रेलमार्ग दयेकेगु निंतिं जुइगु लगानी सुनां गुकथं व छु मोडालिटीइ दयेकेगु धइगु खँ क्वःछीगु ज्या ल्यं दनि । नेपाः सरकारं अनुदान ग्वाहालिं चीन सरकारयात दयेका बिउ धकाः इनाप यानाच्वंगु दुसा चिनियाँ सरकारं आः तक उकिया उचित लिसः मबिउनिगु खँ सीदुगु दु ।

नेपाः सरकारं अनुदानं मखुसा सहुलियत त्यासां जूसां उगु रेलमार्ग दयेकेगु तयारी यानाच्वंगु दु । रेलमार्ग दयेकेत याःगु प्रारम्भिक सम्भाव्यता अध्ययनया फुक्कं खर्च चिनियाँ पक्ष बेहोरे याःगु खः ।

तर रेलमार्गय् लगानी यायेगु बारे धाःसा चिनियाँ पक्षं स्पष्ट याःगु मदुनि । चीनं सन् २००६ य् ११ सय किमि ताःहाकःगु रेलमार्ग तिब्बतया राजधानी ल्हासा तक थ्यंके धुंकूगु दु । चीनं उगु हे रेलयात नेपाःया सीमाना केरुङ तक विस्तार यायेत्यंगु दु ।