भरतपुर अस्पतालय् छम्ह कोरोना संक्रमित सित

चितवन (रासस) – नारायाणी सामुदायिक अस्पताल भरतपुरय् कोरोना संक्रमण पुष्टि जुया सोमवाः बहनी भरतपुर अस्पताल हःम्ह छम्ह बिरामी सीगु दु । बिरामी थौं सुथय् ७ः०५ बजे मदुगु अस्पतालं पुष्टि याःगु दु ।

अस्पताल विकास समितिया अध्यक्ष डा. भोजराज अधिकारीया कथं उम्ह मनू सुथय् मदुगु खः । चिकित्सकतय् कथं कोभिड-१९ निमोनियाया कारणं उम्ह मनू मदुगु खः ।

अस्पतालया प्रमुख मेडिकल सुपरिटेन्डेन्ट डा. श्रीराम तिवारीया कथं उम्ह मनूयात नारायणी सामुदायिक अस्पतालया सघन उपचारकक्षय् भेन्टिलेटरय् तयातःगु खः । बिरामी गम्भीर जूगुलिं अस्पताल यंकेगु व मयंकेगु धाइगु खँय् सहलह यानाः सनिलय् बिरामीयात अस्पतालय् भर्ना याःगु खः ।

शुक्रवाः स्वाब परीक्षणया निंतिं छ्वःगु खःसा वया लिच्वः सोमवाः वःगु खः । जिल्लाय् कोरोना संक्रमणपाखें सीम्ह थ्व न्हापांगु घटना खः । भरतपुर महानगरपालिका-११ सामनाटोलया उम्ह मनू ६८दँया खः । प्रमखु जिल्ला अधिकारी नारायणप्रसाद भट्टराईं सीम्ह व्यवस्थापन नेपाली सेनां याइगु धयादिल ।

छेँजःया परामर्शय् धार्मिक विधिकथं सीम्ह व्यवस्थापन याइगु वय्कलं जानकारी बियादिल । सोमवाः जक थनया प्रयोगशालाय् स्वाब परीक्षण याःपि ३ सय १० मध्ये ३०म्हेसित कोरोनाया संक्रमण खनेदुगु खः । उकी मध्ये २४म्हेसिया चितवनया थीथी थासय् स्वाब संकलन याःगु खः ।