समर्थन लित कयागु राजपाया जानकारी
येँ – राष्ट्रिय जनता पार्टीं म्हिगःनिसें वर्तमान सरकारयात बिउगु समर्थन लित काःगु जानकारी संसदपाखें याकूगु दु । प्रतिनिधिसभाया म्हिगः बैठक न्ह्यायेवं राजपाया सांसदतय्सं थःथःगु थासं दनाः विरोध यासें थ्व सम्बन्धी जानकारी याकूगु खः ।राजपा सांसद महेन्द्र यादवं वर्तमान सरकारं थःपिं लिसे याःगु प्रतिबद्धता पूमंवंकूगुलिं समर्थन लित कायेगु धकाः निर्णय पार्टी याःगु जानकारी बियादीगु खः ।
वय्कलं सरकारया शान्ति, स्थिरता, सुशासन व मधेशया मुद्दायात संबोधन यायेगु प्रतिबद्धता कथं सरकारयात समर्थन यानागु खः, तर सरकारं बारम्बार आश्वासन बिल तर प्रतिबद्धता प्वंकेगु ज्या धाःसा मयाः, अथे जुयाः थःपिंसं सरकारयात बिया वयाच्वनागु समर्थन लित कयागु खः धयादिल ।
सार्वभौमिकतालिसे स्वानाच्वंगु नागरिकता लगायत जायज मागयात सरकारं चिउताः मक्यंगु व मधेश आन्दोलनया झ्वलय् टीकापुर घटनायात सम्बोधन मयाः धासें आवंलिं थःपिंसं सरकारयात यानागु समर्थन लित कयागु खँ वय्कलं धयादिल ।
LEAVE YOUR COMMENTS