ने. सं. ११४६ बछलाथ्व तृतीया - अक्षय तृतीया, भिक्षु प्रज्ञानन्द महास्थविरया १२६ क्वःगु बुदिं

सेनां कब्जा यानातःगु ख्वनाया जग्गाय् वाः पीत स्थानियतय् ट्याक्टर

येँ – येँ नं निजगढ स्वाइगु फास्ट ट्रायक दयेकेगु निंतिं नेपाली सेनां कब्जा यानातःगु खोनाया बुँइ म्हिगः स्थानीय जनतां वा पीगु नितिं बुँ पालेत वंगु इलय् सेना लिसे विवाद जूगु दु ।

बुँ पालेत ट्य्राक्टर सहित वंपिं स्थानियतय्त सेनां पंगु खः । अथे खःसां स्थानियतय्सं बुँइ ट्याक्टर धाःसा चले याःगु दु ।

यल उपमहानगरपालिकाया २१ वडाया वडाध्यक्ष रविन्द्र महर्जनया कथं स्थानीय जनतां सेनां कब्जा यानातःगु थःपिनिगु जग्गाय् वा पी दयेमाः धकाः ट्राक्टर ज्वनाः बुँ पालेगु कुतः याःगु खः । वडाध्यक्ष महर्जनं तत्काल बुँ पालेगु ज्या दिकाः सहलह यानाः जक गुकथं न्ह्याःवनेमाः धकाः थम्हं सल्लाह बियागु खँ ‘नेपालभाषा टाइम्स’ यात कनादीगु दु ।

फास्ट ट्रायक आयोजनाय् लानाच्वंगु बुँइ वंगु दँय् नं स्थानीय किसानतय्सं वा पीगु कुतः याःगु खःसा सेनां उकियात पनाबिउगु खः ।

स्थानीय जनतां खोनाय् फास्ट ट्रायक दयेकल धाःसा अनया संस्कृतियात लिच्वः लाइ धासें फास्ट ट्रायकया विरोध याना वयाच्वंगु खः । आयोजनां खोनायात जिरो प्वाइन्ट दयेकाः अन सतक दयेकेगु ज्या यानाच्वंगु दु ।