थेच्वय् झिक्वःगु ज्ञानमाला जागरण

यल – नेपाल राष्ट्रिय ज्ञानमाला समिति ललितपुर क्षेत्रीय उपसमितिया ग्वसालय् झिक्वःगु ज्ञानमाला बौद्ध जागरण अभियान ज्याझ्वः जुल । धर्मस्थली ज्ञानमाला भजन खलः थेच्वया व्यवस्थापानय् महाजल पुस्करणीय बुद्ध विहार थेच्वय् जूगु उगु ज्याझ्वः धर्मस्थली ज्ञानमालाया नायः नन्दगोपाल महर्जनया सभापतित्वय् जूगु खः ।

गोदावरी नगरपालिकाया प्रमुख गजेन्द्र महर्जनं ज्याझ्वःया उलेज्या यासें ज्ञानमालापाखें बुद्ध शिक्षा प्रचार यायेगु बांलाःगु ज्या खः धासें नगरपालिकापाखें नं बुद्ध धर्म व ज्ञानमालाया प्रचारया निंतिं ग्वाहालि यायेगु इच्छा प्वंकादिल ।धर्मस्थली ज्ञानमालापाखें लसकुस म्येँ न्ह्यब्वसें न्ह्याःगु ज्याझ्वलय् विहारया न्वकु दक्ष महर्जनं लसकुस यानादीगु खः ।

ज्याझ्वलय् विशेष पाहांकथं झायादीम्ह समितिया केन्द्रीय नायः रमना श्रेष्ठ, महासचिव इन्द्रमुनि शाक्यं नुगःखँ तयादीगु खः । सिद्धार्थ ज्ञानमाला भजन खलकं न्ह्यब्वःगु भजनयात कयाः भिक्षु पञ्ञासारं वर्णन यानाबिज्याःगु खः ।

बौद्ध भजन शिरोमणि किरण शाक्यया विशेष उपस्थिति दुगु ज्याझ्वलय् उपसमितिया संयोजक लक्ष्मीबहादुर महर्जनं सुभाय् देछानादीगु खःसा विहारया नायः महन्तलाल महर्जन व सिद्धार्थ ज्ञानमालाया न्वकु लक्ष्मीबहादुर महर्जनयात दोसल्लां न्ययेकाः हंगु खः ।