ग्वलय् १८ औं शताब्दीया फल्चा पुनःनिर्माण
येँ(नेपालभाषा टाइम्स)÷येँ महानगरपालिका ८ वडाया पशुपति देवपतनस्थित भकुंत्वालय् च्वंगु पुलांगु ऐतिहासिक फल्चा पुनःनिर्माण याःगु दु उगु फल्चा १८ औं शताब्दीपाखे जुजु सिद्धिनरसिंह मल्लं निर्माण याःगु खँ फल्चाय् स्थापना याःगु ल्वहंपती न्ह्यथनातःगु दु ।
सम्पदा तथा पर्यटन समितिया संयोजकलिसें ८ वडाअध्यक्ष आशामान संगतं करिब २१ गू लख लागतय् नेवाः शैलीं पुनःनिर्माण याःगु फल्चाया उलेज्या यानादीगु खः । पुनःनिर्मित फल्चाय् तयातःगु ल्वहंपती उगु फल्चा १८ औं शताब्दीपाखे जुजु सिद्धिनरसिंह मल्लं निर्माण याःगु खँ न्ह्यथनातःगु दु ।
जीर्ण अवस्थाय् थ्यंगु फल्चा पुनःनिर्माण लिपा आः उकिया उपभोग यायेफइगु जूगु दु । वडाअध्यक्ष संगतं जीर्ण जुयाः उपभोग याये फइगु अवस्था मदयेवं पशुपति क्षेत्र विकास कोषं फल्चा चिइकेत गाक्कं कुतः याःगु खःसां थःपिंसं उकियात सफल याके मबियागु खँ धयादीगु दु ।
कोषया हे कारण. फल्चा पुनःनिर्माण यायेत गाक्कं दुःख फयेमाःगु खँ न्ह्यथनादिसें आः फल्चा पुनःनिर्माण जुइधुंकाः परम्परागत दाफा भजन संस्कृतियात निरन्तरता बीगु ग्वाहालि जुइगु विश्वास नं वय्कलं प्वंकादीगु दु । भकुंत्वाः उपभोक्ता समितिया अध्यक्ष भाइराजा डंगोलं मौलिक नेवाः शैलीइ फल्चा निर्माण लिपा आः उगु फल्चां पहिचान कायम यायेत सफल जूगु खँ धयादीगु दु ।
LEAVE YOUR COMMENTS