भोतिहिति फलफुल गल्लीया पसःथुवाःया कलाःम्हेसित कोरोना, मेपिं स्वसःम्हेसिया रिपोर्ट नेगेटिभ

येँ – भोताहिति तू गल्ली (फलफुल गल्ली)इ कोल्ड स्टोर पसः तयाच्वंम्हेसिके कोरोना संक्रमण जुइवं वय्कःया छेँजःपिनि नं स्वाब परीक्षण याना स्वःगुलिं वय्कःया कलाःम्हेसिके नं कोरोना संक्रमण खनेदुगु दु । पिसिआर प्रविधिं यानास्वःगु परीक्षणय् वय्कःया कलाःम्हेसिके पोजिटिभ वःगु जानकारी बियाहयेधुंकूगु खँ येँ महानगरपालिका २७ वडाया अध्यक्ष चिनियाँ मान वज्राचार्यं कनादीगु दु । कलाःम्हेसिके पोजिटिभ खनेदुसां वय्कःया झिंस्वदँ दुम्ह म्ह्याय्या रिपोर्ट धाःसा नेगेटिभ वःगु सीदुगु दु ।

वय्कःयात महाबौद्धय् पसः तयाच्वंपिं कोरोना पुष्टि जूपिं भारतीय मूलया नागरिकतय् पाखें हे संक्रमण जूगु अनुमान याःगु दु । असं भुमुल छेँ जुयाः महाबौद्धय् पसः तयाच्वंपिं शाह थरया न्याम्हं छेँजःपिंत कोरोना पुष्टि जूगु खः । उकी मध्ये छम्ह भोताहितिया पसलय् अप्वः धयाथें बियर न्याःवइम्ह जूगु खँ सीदुगु दु ।

महाबौद्धय् पसः तयाच्वंपिनि छेँजःपिंके कोरोना पुष्टि जुइवं वया लिसे स्वापू दुपिं ३०२ म्हेसिके स्वाब संकलन यानाः परीक्षण याःगु खः । थ्व परीक्षणय् स्वसःम्हेसिया लिच्वः धाःसा नेगेटिभ वयेधुंकूगु दु । थुकी मध्ये छम्ह कोल्ड स्टोर पसःया कलाःयाके संक्रमण खनेदुगु खःसा मेम्ह छम्हेसिया रिपोर्टय् धाःसा प्रविधिक समस्या खनेदयाच्वंगुलिं जानकारी मवःनिगु सीदुगु दु ।

संक्रमित पसल्यालिसे घनिष्ठ मिले जूम्ह मेम्ह छम्ह पासाया धाःसा स्वाब परीक्षण जू मजू सीमदुनिगु खँ धाःगु दु । उम्ह मनू कोल्ड स्टाेर पसः लिक्क हे जा पसः तयाच्वंम्ह जूगु खँ धाःगु दु । वयात नं परीक्षण याकेत धयागु खःसां आः सम्पर्कय् मवयाच्वंगु खँ २७ वडाया सदस्य नरेश महर्जनं कनादीगु दु । जाः पसः तयाच्वंम्ह १३ वडा, ताहाचलय् दाहाल थरयाम्ह खः । उमित ट्रेस यायेत जनसेवा डिएसपी कार्यालयय् धायेधुनागु खँ नं भाजु महर्जनं कनादीगु दु ।