थनिंनिसें निन्हुयंकं भिटामिन ए कार्यक्रम

येँ – सरकारं थनिंनिसें देय्न्यंकंया मस्तय्त भिटामिन ए नकेगु ज्याझ्वः न्ह्याकूगु दु । मचा बूगु खुलांनिसें न्यादँ दुपिं मस्तय्त भिटामिन एलिसें किमिया वासः नकेगु नापं लप्पाया नाप कायेगु ज्याझ्वः न्ह्याकूगु खः । स्वास्थ्य तथा जनसंख्या मन्त्रालयं दँय्दसं खुलांनिसें न्यादँ दुपिं मस्तय् निंतिं दछिया निक्वः बैशाख ६–७ व कात्तिक २–३ गते थुगु अभियान न्ह्याका वयाच्वंगु खःसा थुगुसी कात्तिक २ व ३ गते मोहनि नखः लाःगुलिं थौंकन्हय् निन्हुयंकं थ्व ज्याझ्वः यायेत्यंगु खः ।

मन्त्रालयलिसें संयुक्त राष्ट्र संघया युनिसेफ व मस्तय् निंतिं ज्या यानावयाच्वंगु मेमेगु अन्तर्राष्ट्रिय निकायं उच्च प्राथमिकता बियातःगु थुगु अभियानया निंतिं देय्न्यंकं स्वीखुद्वः बुथय् ख्वीद्वः स्वयां अप्वः स्वास्थ्यकःमि व स्वयमसेविका परिचालन याइगु जूगु दु ।