येँ मनपां गुंला बाजं खलःयात आर्थिक ग्वाहालि लःल्हात

येँ – येँ महानगरपालिकां येँया थीथी गुंला बाजं खलःयात आर्थिक अनुदान लःल्हाःगु दु । येँ महानगरपालिका सम्पदा तथा पर्यटन विभागया ग्वसालय् थनया नेपाः ब्यांक्वेटय् जूगु छगू ज्याझ्वलय् येँया थीथी नीस्वंगू गुंला बाजं खलःयात म्हति छगू लख तका दरं आर्थिक अनुदान लःल्हाःगु खः ।

येँ मनपाया प्रमुख विद्यासुन्दर शाक्यया सभापतित्वय् जूगु ज्याझ्वलय् उपप्रमुख हरिप्रभा खड्गी श्रेष्ठं लसकुस यासें येँ मनपां धार्मिक व सांस्कृतिक सम्पदाया संरक्षणया निंतिं ग्वाहालि याना वयाच्वंगु व थुकियात निरन्तरता बिया वनेगु जुइधयादिल ।

वय्कलं येँ देय्या जीवन्त संस्कृतिया संरक्षण यायेगु येँ मनपाया योजनाकथं हे गुंला बाजं खलःयात जक मखसे न्ह्यःने वयाच्वंगु येँयाःलिसे सम्बन्धित जात्राया थीथी खलःयात नं उकथं ग्वाहालि यायेगु याना वयाच्वंगु खँ कनादिल । प्रदेश नं ३ या सांसद राजेश शाक्यं येँ महानगरपालिकाय् निर्वाचित जनप्रतिनिधि वयेधुंकाः संस्कृति व सांस्कृतिक संरक्षणया ज्याय् प्रतिवद्धता प्वंकू कथं हे येँ मनपां थुकथं ग्वाहालि यानाच्वंगु खः धयादिल ।

वय्कलं येँ मनपाय् निर्वाचित जनप्रतिनिधि वयेधुंकाः हरेक वडाय् आपालं विकास निर्माणया ज्या जुयाच्वंगु तर उकियात स्वये मफुपिंसं गलतधंगं ब्याख्या यायेगु यानाच्वंगु व झी नं उकिया हे लिउलिउ वनाच्वंगुलिं इलय् हे सचेत जुइमाः धयादिल ।

लिसें वय्कलं येँ मनपापाखें प्राप्त आर्थिक अनुदानया ग्वाहालिं हे येँ देय्या म्हसीका जुयाच्वंगु मरुसतः दयेकेगु ज्या मदिक्कं न्ह्याः वनाच्वंगु धासें क्वःछिनातःगु इलय् हे मरुसतः क्वचायेकेगु लक्ष्य तयाः ज्या न्ह्यानाच्वंगु जानकारी बियादिल ।

आर्थिक ग्वाहालि ध्यबाया ल्याखं अपाय्सकं तःधंगु मखु अय्नं ध्यबाया अनुपातय् चिधंगु जूसां उकियात वइगु दिनय् अप्वयेका यंकेगु जुइधयादिल ।

येँ क्षेत्र नं ६पाखें संघीय संसदया दुजः लिसें पुलांम्ह रक्षामन्त्री भीमसेनदास प्रधानं सरकारं पशुपतिइ आरती याइबलय् राष्ट्रिय गान हायेकेगु गुगुंकथंया उचित मजू धयादिल । वय्कलं आर्यघाट थेंज्याःगु थासय् उकथंया योजनां धर्म निरपेक्षताय् गम्भिर न्ह्यसः दनेफुगु खँय् सचेत यासें पशुपतिइ सीम्ह उइत हइबलय् दुःखं नं च्वनेगु कि राष्ट्रिय गान हायेकीबलय् दनाः उकियात सम्मान यायेगु धकाः न्ह्यसः तयादिल ।

अथे हे येँ क्षेत्र नं ९पाखें संघीय संसदय् प्रतिनिधित्व यानादीम्ह पुलांम्ह राज्यमन्त्री कृष्णगोपाल श्रेष्ठं येँ मनपाया मेयर शाक्ययात दानवीरया संज्ञा बियादिसें येँ मनपां सही थासय् सही ज्याया निंतिं ग्वाहालि यायेगु यानाच्वंगु धयादिल । येँ मनपाया मेयर शाक्यं यानाच्वंगु विकासया ज्या व आर्थिक अनुदान बीगु ज्यायात गलत अर्थय् कयाः बय् बय् यायेत स्वयाच्वंगु द्वपं बियादिल ।

सभापतिया थासं येँ मनपाया प्रमुख शाक्यं येँ मनपां बिउगु आर्थिक ग्वाहालि ध्यबाया ल्याखं अपाय्सकं तःधंगु मखु अय्नं ध्यबाया अनुपातय् चिधंगु जूसां उकियात वइगु दिनय् अप्वयेका यंकेगु जुइधयादिल ।

लिसें वय्कलं बाजं गुरुपिंत नं सम्मान यायेकथं यें मनपाय् थःपिं निर्वाचित जुया वयेधुंकाः थगुनेनिसें बाजं गुरुयात नं सम्मान यायेगु परम्परा न्ह्याकागु व थुगुसी नं ई मिले यानाः उगु ज्याझ्वःयात निरन्तरता बीगु जुइ धासें गुथि, खलःपाखे वःगु सुझाव कथं हे गुथिया नेतृत्व यानाच्वंपिं कजि नायःपिंत हनेगु विचाः यानाच्वनागु दु धयादिल ।

ज्याझ्वलय् गुलां लछियंकं धाःबाजं थानाः वंगु कसाः तःधं गुथि, चस्वांद्वँ मानन्धर सनाःगू खलः, असं बाजं गुथि, स्वयम्भू गुंला बाजं खलः, केशचन्द्र गुंला बाजं खलः, तेबहाः गुंला बाजं खलः, ओमबहाः गुंला बाजं खलः, थँहिति मानन्धर गुथि, न्यागःमणि फेदि धाःबाजं खलः, रत्नमण्डल महाविहार सर्वसंघ, पाक्व पुखुद्यां मानन्धर सनाः खलः, लाय्कूसाः मानन्धर समाज, कीर्तिपुण्य महाविहार, क्वहिति, न्यत तुलाधर गुंला बाजं खलः, मानन्धर सनाःगू खलः न्हूसाः, कीर्तिपुण्य महाविहार, ललगं, ताम्राकार गुंला बाजं खलः, धर्मचक्र महाविहार बाजं खलः, त्यंघः कुमाः बाजं खलः, भिंद्यः गुथि, दैसाः त्वाः मानन्धर समाज, चारुमति गुंला बजां खलः व जयबागेश्वरी धाःबाजं खलः यात आर्थिक ग्वहालि लःल्हाःगु खः ।

 

सम्बन्धित बुखँ

LEAVE YOUR COMMENTS