एमालेलिसे मधेसवादी लोसपा

येँ (नेपालभाषा टाइम्स)-संसदं पारित यानाछ्वःगु नागरिकता विधेयक राष्ट्रपतिं प्रमाणीकरण मयाःगु कारणं मधेसवादी दलत राष्ट्रपति भण्डारी व भण्डारीया पार्टी नेकपा (एमाले) लिसे तम्वयाच्वंगु इलय् मधेस लागाया छगू प्रमुख राजनीतिक दल लोकतान्त्रिक समाजवादी पार्टी (लोसपा) धाःसा एमालेलिसे हे तालमेल यानाः चुनाव ल्वायेगु निर्णय याःगु दु ।

थुकिया लागिं म्हिगः लोसपाया नेता महन्थ ठाकुर लगायतया पुचलं एमालेलिसे सहलह ब्याकूगु खः । थ्व झ्वलय् सिटया तालमेल मिले यायेत छगू समिति नं गठन याःगु दु ।

एमालें संविधान विपरित ज्या याःगु धासें थीथी राजनीतिक दलत छथाय् च्वनाः तालमेल यानाच्वंगु इलय् मधेस आन्दोलनया आपालं वरिष्ठ नेतात दुगु लोसपां धाःसा एमालेलिसे तालमेल यायेगु तयारी शुरु याःगु खः ।

लोसपाया वरिष्ठ नेता राजेन्द्र महतों राष्ट्रपति भण्डारीं नागरिकता विधेयक विफल याःगु खःसां चुनाव व नागरिकता विधेयक बिस्कं बिस्कं मुद्दा जूगु कारणं थुकियात छथासं तयाः स्वये मजिउगु खँ धयादीगु दु । राष्ट्रपतिया पलाःयात लोसपां नं विरोध याःगु खः ।

नागरिकता विधेयकयात एमाले जक मखु मेमेगु राजनीतिक पार्टीतय्सं नं विरोध याःगु दु धासें महतों धयादिल, ‘न्हापा एमालें विधेयक हःबलय् गठबन्धनं विरोध यात, आः गठबन्धनं विधेयक हःबलय् एमालें विरोध यात । थ्व मामिलाय् थुपिं फुक्क छगू हे खः ।’

थ्वहे झ्वलय् राष्ट्रपति भण्डारी विरुद्ध जनता समाजवादी पार्टीं धाःसा आन्दोलनया घोषणा याःगु दु । जसपा नेता रामसहायप्रसाद यादवं पार्टीया मधेश कमिटीं थनिंनिसें चरणबद्ध रुपय् आन्दोलनया यायेगु खँ कनादीगु दु । थ्व झ्वलय् थौं मधेशया च्यागू जिल्लाया सदरमुकामय् राष्ट्रपतिया पलाःयात कयाः थीथी पक्षलिसे खँ ब्याकेत्यंगु दु ।