दुगडयात कारवाही यायेत उपभोक्ता मंचया माग

येँ- राष्ट्रिय उपभोक्ता मंचं दुगड स्पाइसेस एण्ड फुड प्रोडक्टस् प्रा.लि.यात कारवाही यायेत माग याःगु दु । मंचं देशय् प्रचलित कानून हाचां गायाः राजकीय अधिकारया दुरुपयोग याःगु धासें दुगड कम्पनीयात कारवाही यायेत माग याःगु खः ।

मंचया अध्यक्ष प्रेमलाल महर्जनं ल्हाःचिं तयाः जारी याःगु छगू विज्ञप्तीइ तत्कालीन उद्योग, वाणिज्य व आपूर्ति राज्यमन्त्री मोतिलाल दुगड संचालक जुयाच्वंगु दुगड स्पाइसेसयात कारवाही यायेत माग याःगु खः ।

नेपालय् आयोडिनयुक्त चि उत्पादन, भण्डारण व विक्री वितरण यायेगु अधिकार नेपाल सरकारं साल्ट ट्रेडिंग कर्पोरेसनयात जक बियातःगु खःसां तत्कालीन राज्यमन्त्री दुगड संचालक जुयाच्वंगु दुगड स्पाइसेस एण्ड फुड प्रोडक्टस् प्रा.लिं. प्रचलित कानून हाचां गायाः राजकीय अधिकारया दुरुपयोग यानाः आम नागरिकया जीवनतकं जोखिमय् लाकेगु, अप्वः मू कयाः अनुचित व्यापार कोरोबार व कालोबजारी याःगु दावी यासें मंचं उकथं कारवाहीया माग याःगु खः ।

मंचं थनिं करिब दछि न्ह्यः हे तत्कालीन प्रधानमन्त्रीयात अवैध व गैरकानूनी रुपं चि उत्पादन व विक्री वितरण यानाच्वंगु धासें कम्पनीयात कारवाहीया निंतिं माग यानागु व उकियात कयाः छुं नं कारवाही मजूगु अःखबतं प्रतिशोधपूर्ण तरिकां नेपाल सरकारया उपभोक्ता संरक्षण परिषदपाखें राजीनामा बीत बाध्य याःगु खँय् दुःख प्वंकुसे पुनःकारवाहीया निंतिं माग याःगु दु ।
झिंछलातक नं थःपिंसं बियागु निवेदन उपर छुं नं कारवाही मजूगुलिं वर्तमान सरकारं घोषणा याःगु साझा ज्याझ्वःपाखें भ्रष्टाचार जन्य क्रियाकलाप पूर्ण नियन्त्रण व आपूर्ति व्यवस्थायात सहज यानाः गुणस्तरीय वस्तु व सेवा प्रवाह यायेत नं मंच माग याःगु दु ।