किपुली नेपालभाषा स्यनामि काइन

किपू -किपू नगरपालिकां थ्वहे दँनिसें स्थानीय विषयया रुपय् शुरु यायेत्यंगु नेपालभाषा कक्षाया लागिं स्यनामि (शिक्षक) कायेगु ज्या न्ह्याकूगु दु । आःयात अन नगरपालिकापाखें झिम्ह शिक्षक माग याःगु खः । उकिया लागिं ७१ म्हेस्यां निवेदन बिउगु खँ सीदुगु दु । किपूया स्कुलय् ब्वंकः वनेगु लागिं येँयापिं नं आपाःसिनं निवेदन बिउगु खँ धाःगु दु । आः निवेदन दुकायेगु बन्द जुइधुंकूगु दुसा थ्व धुंकाः अन्तर्वार्ता कयाः पास जूपिं शिक्षकत कायेगु ज्या जुइगु खँ धाःगु दु ।

किपू नगरपालिकां थुगु दँय् १ निसें ३ तगिं तक नेपालभाषा विषय ब्वंकेगु निर्णय यायेधुंकूगु दु । अन नं निजी स्कुलया शिक्षकतय्त भाषा सम्बन्धी तालिम बीगु ज्या जुइधुंकूगु दु ।