भुइजःसि देगः क्षेत्र सिल

रासस – बूढानीलकण्ठ नगरपालिका-३ स्थित भुइजःसि देगः व शिवपुरी राष्ट्रिय निकुञ्ज क्षेत्र लिक्क सिल याःगु दु । बूढानीलकण्ठ–३य् च्वनीम्ह ३७दँया मिजंयात कोरोना संक्रमण पुष्टि जुइवं उगु क्षेत्र बन्द याःगु वडाध्यक्ष बालकृष्ण श्रेष्ठं जानकारी बियादिल । उगु क्षेत्रय् मनूत वयेवनेगु नापं पसः, व्यवसाय व मेगू सेवा पूर्ण रुपय् बन्द याःगु दु ।

संक्रमितयात आः शुक्रराज ट्रपिकल तथा सरुवा रोग अस्पताल टेकुया आइसोलशनय् तयातःगु दु। वडाध्यक्ष श्रेष्ठया कथं सङ्क्रमित मिजं बन्दाबन्दीया इलय् थःगु निजी गाडीयात एम्बुलेन्सया कथं छ्यलाः समस्याय् लाःपिं मनूतय्त अस्पतालतक यंकेगु ज्या यानाच्वंगु खः । नगरपालिकाय् कोरोना संक्रमितत निम्ह थ्यंगु दु ।

थ्वस्वयां न्ह्यः सर्लाहीया रामनगर स्थायी छेँ जुयाः आः बूढानीलकण्ठ-१२या तेञ्जिङ चोकय् च्वनाच्वम्ह १८दँया मिसायात कोरोना भाइरस पोजेटिभ खनेदुगु खः ।