जनतां कर मपुलाः हैरान

येँ – आर्थिक स्रोत मदयाः सक्वया विकास निर्माणय् लिच्वः लानाच्वंगु खँ नगरप्रमुख सुवर्ण श्रेष्ठं कनादीगु दु । स्थानीय निकायं कर म्हयेगु व्यवस्था दुसां जनतां मथूगुलिं कर म्हयेत नं समस्या जुयाच्वंगु खँ वय्कलं ‘नेपालभाषा टाइम्स’ यात कनादिल । । वय्कलं धयादी, ‘न्हापा गाविस जुयाच्वंगु इलय् कर पुलेम्वाः, आः पुलेमाः धायेवं जनतां थाकु थें तायेकाच्वन ।’आः थम्हं करया दायर अप्वयेके त्यनागु खँ नं वय्कलं कनादिल । कर कायेगु शुरु यायेवं स्थानीय जनतां विरोध याःगुलिं आः कर छाय् पुलेमाः धकाः थुइकेगु निंतिं न्हिंन्हिं प्यम्ह न्याम्ह कर्मचारीतय्त जनताया छेँ व पसलय् छ्वयाच्वनागु जानकारी नं वय्कलं बियादिल । जनतां पुलीगु करं हे स्थानीय निकायया विकास जुइगु खँ कनादिसें जनतां कर हे मपूगुलिं आः समस्या जुयाच्वंगु खँ वय्कलं कनादिल । वय्कःया कथं थज्याःगु समस्या शंखरापुर नगरपालिकाय् जक मखुसें न्हापा गाविस जुयाच्वंगु मेमेगु नं आपालं नगरपालिकाय् जुयाच्वंगुलिं न्हूगु नगरपालिकातय् लागिं थ्व छगू मंकाः समस्या जुयाच्वंगु दु ।