ने. सं. ११४६ बछलागा तृतीया -

जगतसुन्दरय् मचा चिनाखँ वाचन प्रशिक्षण

येँ(नेपालभाषा टाइम्स)÷जगतसुन्दर ब्वनेकुथिइ मस्तय् निंतिं निन्हुयंकंया चिनाखँ वाचन प्रशिक्षण ज्याझ्वः जुल । वल्र्ड नेवाः अर्गनाइजेसन नेपाः देय् मूकवःया ग्वसालय् वंगु चिल्लाथ्व एकादशि व द्वादशि निन्हुयंकं उगु प्रशिक्षण ज्याझ्वः जूगु खः ।

जनकवि दुर्गालाल श्रेष्ठं च्वयादीगु लोकंह्वाःगु मचा चिनाखँ ‘चिनियाम्ह किसिचा’ चिनाखँयात कयाः उगु प्रशिक्षण जूगु खः । प्रशिक्षण ज्याझ्वलय् ब्वनेकुथिया मुक्कं २४ म्ह ब्वँमिपिंसं ब्वति कयादीगु खः ।

थ्व हे झ्वलय् थुगुसी खुक्वःगु हलिं नेवाः न्हिया लसताय् कन्हय् शनिवाः ब्वनेकुथिइ जनकवि श्रेष्ठया थुगु हे मचा चिनाखँयात कयाः चिनाखँ वाचन याइगु जूगु दु । दबूया साहित्यिक राजदूत राजभाई जकःमिया संयोजकत्वय् म्येँ हालामि पवित्र कसाः व ब्वनेकुथिया प्रिन्सिपल सुनिता मानन्धर दुथ्याःगु छगू पुचलं मस्तय्त चिनाखँ वाचनया प्रशिक्षण बिउगु खः ।